KAPIT: Program Aram Ngelala Budaya enggau Adat Asal Etnik Bagatan diatur ngambi nyagu sereta negap pemereti ati ngagai pesaka budaya komuniti nya ti mega sebagi ari pesaka bemacham budaya Sarawak.

Program nya udah dipenyadi Sapit Menteri Dagang Temuai, Industri Kreatif enggau Seni Pemerindang Sarawak (MTCP), Datuk Snowdan Lawan di Rumah Philip, Nanga Merit ditu, kena Hari Enam.

Etnik Bagatan nya sebagi ari 34 etnik ba Sarawak enggau dipelaba populasyen kurang ari 10,000 iku ti asal ari 18 rumah panjai ba sitak Rajang, Anap di Bintulu sereta Penyarai di Tatau.

Komuniti Bagatan bisi penyelai kediri empu ari sukut adat asal, jaku, sejarah, pesaka enda nyengala enggau tradisyen.

Atur program tu mega nerima sukung Turu Ngemansang Pesaka Asal enggau Seni nyadi inisiatif ngemujur pengawa nyaga, dokumentasyen enggau bekunsi penemu pesaka budaya enda nyengala.

Program tu diatur Gerempung Orang Dagang Sarawak enggau kerejasama komuniti lokal ba Kapit dikena nyagu adat asal enggau sejarah komuniti Bagatan seraya ngemansang krafjari sereta dagang bepelasarka pesaka asal.

Inisiatif nya nentuka elemen budaya Bagatan diangkat nengah ngasilka produk krafjari asal, seni pengias enggau pekayan identiti lokal lalu ngerandang peluang nambah ekonomi ngagai komuniti lokal kelebih agi raban nembiak enggau indu.

Bela datai, Tuai Unit Pesaka Asal enggau Industri Kreatif Dr Elena Chai, pengari Residen Kapit Daniel Batin, Pegawai Pelilih Kapit Geoffrey Kendawang, Chairman Kaunsil Pelilih Kapit Andy Lawrence, Penghulu Esik, Kaban Kaunsil Pelilih Kapit Aman sereta Sekretari Gerempung Orang Dagang Sarawak Cecilia Lagak.-EDISI UKAS