Datuk Dr Jerip Ngelalau Rayat Terus Nyukung Inisiatif Pemansang Perintah
PADAWAN: Rayat ba nengeri tu dilalau terus meri sukung rat ngagai inisiatif pemansang ti dibai Perintah Sarawak nengah iring Gabungan Parti Sarawak (GPS).
Sapit Menteri Pengangkut Sarawak (Langit enggau Darat), Datuk Dr Jerip Susil madah, sepanjai timpuh GPS ngemudi ngelama tu, mayuh inisiatif pemansang udah dilanchar nyengkaum sektor ekonomi gadung, pemansang infrastruktur enggau ke bukai ungkup pengelantang rayat.
“Aku ngarap semua program pemansang ti udah enggau benung dilanggur deka terus disukung.
“Aku mega ngarap rayat terus meri mandat ngagai perintah GPS ngambi nampung program pemansang ti bisi ditu,” ku iya.
Iya madah munyi nya ba pengerami bejadi UKAS Begulai Enggau Komuniti Ngintu Taun Baru China Kunsil Nengeri (DUN) Mambong, ditu kena Hari Enam.
Ngenang pasal program, iya ti mega Kaban Kunsil Nengeri (ADUN) Mambong madah ke nya ukai semina pengerami ungkup raban bansa China tang mega ngaul raban bansa bukai.
“Endang amat laban kitai tu komuniti pupu bansa enggau pengarap ke alai tetiap pengerami ungkup setaun deka dirami serap komuniti begulai,” ku iya baru.
Ba pengerami nya, iya mega nyua bantu pemakai enggau‘Angpao’ ngagai 10 penerima ari raban rentan.
Sama datai, Kaban Parlimen Puncak Borneo Datuk Willie Mongin, Sapit Residen Bagi Menua Kuching Lim Hock Meng, Sapit Direktor Unit Komunikasi Awam Sarawak (UKAS) ngari ke Direktor iya, Joachim Paggang Jabong, Pegawai Menguasa Pelilih Mit Padawan Julius Scott Sapong enggau Chairman Pengatur Begulai Program, Kapitan Loo Guan Cheat. -EDISI UKAS
