240 Orang Dagang Ngerichah Bazar Ramadan Lawas 2026
LAWAS: Bisi 240 orang dagang ngerichah Bazar Ramadan Pelilih Lawas taun tu seraya mandangka pengerami ti nerima timbal manah sereta pemesai reti bazar nya ngeranchak ekonomi lokal enggau nyendia mayuh pilih pemakai ngagai mensia mayuh sepanjai bulan Ramadan.
Pengawa bejadi Bazar Ramadan Pelilih Lawas 2026 udah diatur ba Dataran Bandar Lawas lalu dipenyadi Kaban Parlimen Lawas, Dato Henry Sum Agong kena Hari Lima.
Ku Dato Henry, bazar ti diatur Kaunsil Pelilih Lawas nya mega ngemata mayuh orang dagang ngambi bagi dibanding taun ti udah.
Ku iya, pengawa ngatur bazar nya ukai semina meri peluang ngagai orang dagang nambah penatai pemisi tang mega ngeranchak ekonomi lokal sereta nyukung pemansang orang dagang mit ngambi terus besemekih.
Nangkan nya, Sekretari Politik Premier Sarawak, Awangku Jinal Abedin madah, pengawa milih taba baru bazar semak Kompleks Opis Administrasyen Lawas nunjukka pemansang deras ti benung diasai ke peranak ba pelilih nya
Pengawa nya mega richah agi nengah pengawa nyadung bubur cha cha ngagai bala pengusung asil pemeri Gerempung Pengelantang Islam Malaysia (PERKIM).
Pia mega, mensia mayuh bepeluang nerima Baucherr RM20 Touch ‘n Go nengah Program Inisiatif Payung Rahmah diatur Opis Menteri Dagang Dalam Menua enggau Belanja Idup (KPDN).
