Sapit Menteri Pengerai ti mega Kaban Parlimen Mukah, Dato Hanifah Hajar Taib madah, pejalai ngabas nya meri peluang ngagai raban opis menteri berati kediri penyadi ba fasiliti pengerai kelimpah mereti ke peminta staf sereta komuniti dia.

 

“Inisiatif baka tu nentuka pengawa ngemanah dipejalai meruan enggau beselinting dikena nambah kualiti ngenatai servis pengerai,” ku iya.

 

Iya madah munyi nya lebuh dirandau pengudah ngatur pejalai ngabas seraya gawa ngagai Klinik Pengerai Kuala Oya, ditu kena Hari Enam.

 

Ku Dato Hanifah, pengawa ngemanah ari sukut fasiliti, pengereja pengawa sereta sukung logistik beguna amat nentuka servis pengerai ti bisi kualiti enggau meruan ulih diasai ke peranak kelebih agi ba menua pesisir.

 

Ku iya agi, opis menteri keran terus negap sistem pengerai menua kelebih agi ba menua pesisir nipak pengawa nyaga pengelantang rayat chara inklusif enggau meruan.

 

Ke rikod, Klinik Pengerai Kuala Oya diatu nyendia servis ngagai urung 5,397 peranak ngaul semilan genturung pendiau ngelingi nya.

 

Tembu ngabas Klinik Pengerai Kuala Oya, Dato Hanifah mega ngabas ke Klinik Pengerai Kampung Medong.

 

Ba kededua pejalai ngabas nya, iya udah mendingka taklimat bekaul sukut servis, pangku pengawa, fasiliti sereta penanggul ti begunaka perati lengkas.

 

Sama datai iya nya Sapit Direktor Opis Pengerai Nengeri Sarawak (Pengurusan) Banges Munga enggau Pegawai Pengerai Bagi Menua Mukah Dr. Muhammad Najib Hasan @ Ahmad.-EDISI UKAS