BARCELONA: Palan Artificial Intelligence Sarawak (SAIC) nyain Sempekat Pemereti Ati (MoU) enggau kompeni 'artificial intelligence' (AI) ari Sepanyol, Llamalítica dikena nengkebang sektor pengerai bepelasarka AI di Sarawak.

Tuai Pegawai Eksekutif SAIC, Profesor Patrick Then madah, kerejasama nya mandangka kuing tuju strategik Sarawak ngena teknologi 'frontier' ngembing penumbuh ekonomi meruan enggau penyulut digital, seriris enggau juluk ati transformasyen digital nengeri.

"Sarawak benung ngemansangka transformasyen ngena teknologi AI ba macham bengkah sektor pengerai.

"Kami deka ngaga ekosistem AI bepelasarka inovasyen ti ulih mai pemaik ngagai servis perintah enggau industri," ku iya nengah penerang media, Hari Empat.

Kerejasama strategik nya ditanggam serimbai Sarawak ngulu Mobile World Congress (MWC) 2026 di Barcelona ke nyadi pelasar mandangka agenda pemansang nengeri nyentuk 2030 ti ngemeratka infrastruktur digital, kaul, inovasyen AI enggau servis perintah bepelasarka teknologi.

MoU nya bekaul pemansang sereta bekenaka teknologi baka AI ti nyukung sistem servis pengerai, lebih agi ngerembaika servis ngagai rayat di menua pesisir.

Kerejasama nya bela besetuju numbuh AI ba klinikal enggau pengawa ngatur ekosistem pengerai Sarawak ti mungkur penyikar pengawa enggau tikas pemanah ngubat pesakit.

Nangkan nya, Tuai Pegawai Eksekutif Llamalítica, Dr. Frederic Llordachs madah, AI bisi pengulih nengkebang transformasyen ba sektor pengerai.

"MoU tu besai reti ngagai sektor pengerai nyengkaum sistem digital," pia ku iya.

Kerejasama enggau bakih antarabansa tebilang baka Llamalítica disadang deka nyungkak servis AI dikemansangka ba Sarawak. -EDISI UKAS