KUCHING: Taun 2026 nyadi 'delivery year' Perintah Sarawak ngenataika servis sereta nentu semua langgur pemansang nengeri lebih agi ba Langgur Pemansang Malaysia Lumpar Ke-13 (RMK-13) enggau Pelin Pemansang Udah COVID-19 (PCDS) 2030 digagaka nyadi asil ti diasai genap iku rayat.

Sekretari Perintah Sarawak, Datuk Amar Mohamad Abu Bakar Marzuki madah, taun tu besai reti dikena mandangka pengulih ke bendar alai kredibiliti perintah deka dipeda bepelasarka asil.

Ku iya, baka ke deka Premier Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg, taun 2026 deka nentu pengulih Perintah Sarawak meri servis gawa.

"Taun tu deka nentu semua langgur nengah RMK-13 enggau PCDS 2030 ulih meri pemaik ngagai rayat.

"Kitai enda ulih ngenggai, nama ke nyadi maya tu majak kompleks. Kelimpah tanggungpengawa ke majak nambah, kitai mega betapi enggau ubah global.

"Geopolitik, ubah polisi dagang antarabansa enggau penanggul ba rentayan bekal global ngeruga ekonomi dunya lalu Sarawak enda tinggal ngasaika pekara nya," ku iya madah nengah Pesan Ninting Bulan Sekretari Perintah Sarawak ungkup bulan Mac 2026.

Ku Datuk Amar Mohamad Abu Bakar, VUCA, iya nya Volatility, Uncertainty, Complexity enggau Ambiguity begunaka orang kereja Perintah Sarawak lebih agi berurun, sikar sereta semampai nyikap diri.

Nya alai ku iya, prinsip 3R iya nya Revisit, Rethink enggau Recharge patut nyadi lalau dikena ngenegapka agi organisasyen, nyungkak tikas chara gawa lalu nentuka pemutus ke digaga deka pulaika pemaik.

"Ambika banding baka kereja nyendiaka pelin begunan enggau opis perintah, chara ke dikena ukai semina bepanggai ba pelin aja.

"Meri servis gawa ukai semina bekaul struktur infrastruktur aja tang nyadi sebagi ari sistem ngenatai servis kereja perintah.

"Enti perengka guna ke disedia enda lantang dikena lalu enda ngira guna ke bendar rayat, tikas ngenataika servis gawa mega enda datai ba tikas ti dikeandal," ku iya madah nyemetak.

Berindik ari nya, ku iya, Tuai Opis Perintah, Pegawai Pelilih Menua, arkitek ari agensi ngaga patut datai meda kediri nama dikedeka rayat.

Iya madah, ba renggat opis perintah, tuai opis meseti lebih agi proaktif ngatur pengawa ngaga projek.

"Pengulih mutarka isu ba agensi enggau opis bekaul projek nyadi kelai ke bendar pemujur pengawa ngatur projek.

"Chara gawa kolaboratif meseti bisi. Reti iya kitai enda ulih gawa kediri agi laban penanggul ke bisi nyadi ulih diputar enggau chara kolektif," ku iya madah baru.

Kelimpah ari nya, iya madah, raban Servis Perintah Sarawak ke nyadi agen pemansang meseti nemu tuju, inisiatif enggau pekara dikemerat perintah.

Iya madah, tanggungpengawa ngemujurka agenda pemansang ukai semina ba siku aja tang dikemujurka agensi enggi opis perintah.

"Komunikasyen ukai semina ngenataika penerang aja tang nentuka polisi perintah ditemu enggau silik," pia ku iya madah.

Iya mega madah, Servis Kereja Perintah Sarawak ulih bediri tegap nyadi siti tim ti kering nengah semangat ‘SCS One Team’, taja napi macham penanggul global enggau pengingin rayat.-EDISI UKAS