PAKAN: Perintah majak meri perati ngagai isu bekal ai ti ditapi peranak menua pesisir ba pelilih tu nengah ngelanggur sekeda chara mutar berenggat nentuka pekara diguna rayat ulih ditangkup.
Kaban Kunsil Nengeri (ADUN) Pakan, Tan Sri William Mawan Ikom madah, mayuh pelin udah dilanggur ngaul inisiatif timpuh pandak enggau panjai dikena mutar penanggul nya.
Ku iya, entara inisiatif ti benung diperunding nyengkaum nirika sistem pam ai dikena nambah peneras bekal ai ba sekeda endur ti suah napi penanggul bekal ai tejanggal.
“Ungkup endur ti apin bisi disadung paipm peranak meseti nganti renggat bukai ungkup projek bekal ai ti udah dilanggur perintah.
“Tang, aku andal ke nadai siku kena tinggal laban Tangki Ai Bakong ti bisi diatu deka ditangkir kelimpah pemansang tangki ai baru ba Gerugu,” ku iya.
Iya madah munyi nya lebuh dirandau ba Pengerami Tuai Ngundang Rayat ba Seliang Kunjan ditu, kemari.
Ku Tan Sri William Mawan, lebuh projek nangkir enggau ngaga tangki ai nya tembu ila, bekal ai disadang ulih disedia ngagai mayuh agi peranak nyengkaum ba Buku.
Ku iya, pemar besai bejalaika projek ba kandang menua pesisir kelebih agi ba endur bebukit iya nya ngaga sambung paip ti begunaka infrastruktur kompleks agi.
