KUCHING: Indu terus ngesan pangku pengawa besai nyadi tiang pemun nempa ruang bilik ti entap sereta komuniti ti lantang.

Berebak enggau nya, Tun Pehin Sri Dr. Wan Junaidi Tuanku Jaafar begulai enggau bini, Toh Puan Datuk Patinggi Fauziah Mohd Sanusi meri Selamat Hari Indu Sedunya ngagai semua indu ba Malaysia kelebih agi ba Sarawak serimbai Hari Indu Sedunya 2026, kena Hari Minggu.

Ku iya, indu nya orang ti pemadu besai reti ba pengidup enggau ngesan pangku pengawa besai sekali ke nyadi indai, bini, anak, tuai bilik tauka tuai komuniti.

"Pangku pengawa indu chukup besai nempa institusyen ruang bilik ti entap nyengkaum nempa komuniti ti tegap enggau lantang," ku iya ba sebengkah penerang serimbai hari besai nya.

Nambah ke nya, iya mega bekunsi peneleba diri empu ti mayuh nempa pemereti iya nengah diembing siku indai lalu penatai bini ti chukup bedisplin enggau mentas sereta udah ngadaka tiga anak indu.

Ku iya agi, penatai bini iya diatu ti mentas enggau ngembing nyadi pengering sereta inspirasyen ba tiap singkang pengidup enggau tanggungpengawa ti disan.

Iya mega ngarap ke Hari Indu Sedunya dikena ngingatka semua kitai ngambi terus ngenang jasa, pengeliat sereta pengepuh raban indu.

Kelimpah ari nya, iya ngemerat pemesai guna nentuka indu semampai dibasa enggau dikaul ba pengawa begulai nempa pemansang ti menyana agi ungkup nengeri enggau menua. - EDISI UKAS