Pengawa Nambah 17 Penuduk DUN Sarawak Disadang Dibantai Ba Parlimen Julai Tu
KUCHING: Perambu nambah 17 penuduk baru Kunsil Nengeri (DUN) Sarawak ti deka ngujungka penuduk nambah ari 82 ngagai 99 penuduk disadang dibantai ba sesyen Parlimen Julai tu.
Sapit Menteri Besai, Datuk Amar Fadillah Yusof madah, randau bekaul pekara nya diatu agi dipejalai ba renggat Perintah Besai sebedau dibantai ngambi diperunding ba Parlimen.
“Diatu, kitai semina berandau ba renggat Perintah Besai lalu kitai melaba perambu nambah penuduk DUN Sarawak nya ulih dibantai sesyen Parlimen Julai tu,” terang iya.
Iya madah munyi nya maya dirandau pemberita pengudah ngulu Iftar Jamaie NEXGEN P194 Petra Jaya 2026 ti diatur di Masjid Al-Ghazali, ditu kena Hari Minggu.
Kaban Parlimen Petra Jaya nya mega madah, sebarang pejalai silik bekaul pekara nya semina deka ditemu pengudah perambu nambah penuduk nya dibantai enggau dikemendar Parlimen.
Ke rikod, Kunsil Nengeri (DUN) Sarawak kena 7 Julai 2025 ngemendar Rang Undang-Undang (RUU) Dewan Undangan Negeri (Komposisi Keanggotaan) 2025 ti ngemata pengawa nambah 17 penuduk baru ngujungka bisi 99 penuduk DUN.
Ba pengawa sebaka, Datuk Amar Fadillah mega nyua duit raya ngagai nembiak tahfiz ari Madrasah Darul Uloom Islamiyyah Rampangi, Madrasah Darul Uloom Al-Fatah enggau Madrasah Tahfiz Al-Qurah Bidayatul Muthadin sereta diberi ngagai peranak Rumah Nyaga Nembiak Mit Toh Puan Hajah Norkiah.- EDISI UKAS
