PAKAN: Pemansang infrastruktur pemun ba kandang menua pesisir diperati ulih nyadi penyungkak ekonomi komuniti menua nya tumbuh, kelebih agi nengah sektor betanam betupi enggau nambah akses makit dikerembai.

Kaban Kunsil Nengeri (ADUN) Pakan, Tan Sri William Mawan Ikom madah, perengkaguna baka jalai enggau infrastruktur ba rumah panjai patut dikena manah peranak ngulih ke penatai pemisi ngena chara sistematik agi.

Ku iya, rayat ba menua ulu bisi pengulih besai ngemansangka aktiviti ekonomi, kelebih agi ba sektor betanam betupi komersial ti majak nerima peminta.

Iya nibar ke jaku nya lebuh datai bejadika projek nyungkur taba rumah di baruh Program Transformasyen Menua Pesisir (RTP) beungkus RM60,000 di Rumah Awin, Sungai Amut, ditu, Hari Enam.

Iya mega meri terima kasih ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti udah ngemendarka projek jalai beungkus RM317 juta ti diatu nyambung Ulu Julau enggau Jalai Besai Pan Borneo.

Ku iya, jalai nya udah ngerandang akses besai agi ngagai peranak menua ulu, lalu sida lantang mindah sereta ngerumban pengawa nyual asil betanam betupi ke makit besai agi.

Berindik ari nya, iya meransang peranak ngena manah tanah ti dikembuan nengah pengawa betanam betupi komersial baka sawit, kupi enggau utai tanam bukai ti engkeman ditanam dia.

Berebak enggau nya, iya ngelalau raban orang bumai ti deka minta ngaga jalai kebun nganjung peminta chara beraban ngambi projek nyamai diadu sereta nentuka ulih ditengah semua.

Kelimpah ari nya, iya mega ngansak orang bumai ngena manah teknologi digital nyual asil betanam betupi sereta perengkaguna transaksi nadai ngena mata duit baka S Pay ngambi pengawa bejual enggau meli nyamai.-EDISI UKAS