SEMATAN: Kembara UKAS 2026 Demi Rakyat diatur nyadi inisiatif strategik nerang penerang bekaul polisi, inisiatif sereta pemansang dipejalaika Perintah Sarawak terus ngagai rayat renggat baruh.
Ditektor Unit Komunikasi Awam Sarawak (UKAS), Awang Putrayusrie Awang Redzuan madah, program nya ukai semina pejalai neresa menua aja, tang nyadi peluang gawa ngundang rayat, ninga empu penemu sida sereta bekunsi penerang pasal bemacham inisiatif pemansang dipejalaika Perintah Sarawak.
“Ngena chara tu, UKAS ulih bejalaika pangku pengawa nyadi jematan komunikasyen entara perintah enggau rayat ari meri penerang ti betul, lurus enggau amat,” ku iya.
Iya nibar ke jaku nya rambau flag off Kembara UKAS 2026 Demi Rakyat di Kilometer 0 Telok Melano Sematan, kena Hari Satu.
Ku iya, kelimpah meri penerang bekaul pemansang nengeri, program nya mega meri peluang ngagai raban UKAS ngulihka timbal penemu peranak pasal empas bemacham inisiatif perintah kelebih agi ba pemansang infrastruktur, ekonomi enggau pengelantang rayat.
“Kitai mega deka meda empu empas pemansang ti udah dipejalai, nyengkaum rentayan jalai alun, jematan enggau perengkaguna bukai ti meri pemaik ngagai rayat, kelebih agi ba menua pesisir,” ku iya.
Dulu ari nya, Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol udah bejadika flag off Kembara UKAS 2026 nya.
Kembara UKAS 2026 Demi Rakyat berengkah ari Telok Melano nyentuk ke Lawas nya ngaul pejalai 1,750 kilometer enggau ngerenchah 27 pelilih menua di selampur Sarawak.
Sama datai Sekretari Politik Premier Sarawak Abang Abdul Aziz Abang Draup, Sapit Tuai Polis Pelilih Lundu DSP Mordani Tanin, Pegawai Tadbir Sarawak Opis Pelilih Lundu, Monalissa Mariah Brain, Pegawai Tadbir Sarawak, Opis Pelilih Mit Sematan, Mohd. Ameerullah Roslan, bala pegawai kanan UKAS, bala tuai komuniti enggau bala bukai.- EDISI UKAS
