Projek Sapat Bah Lebih RM200 Juta Deka Mutar Penanggul Bah Di Batu Kawa
KUCHING: Inisiatif mutar penanggul bah di genturung pendiau Batu Kawa majak chakah dipejalai lebuh sekeda projek sapat bah beungkus RM200 juta benung enggau udah dipejalai dikena nyaga penglikun beribu peranak dia.
Sapit Premier Sarawak ti mega Kaban Kunsil Nengeri (ADUN) Batu Kawa, Datuk Amar Profesor Dr. Sim Kui Hian madah, genturung pendiau Batu Kawa endang suah ampuh, tang penusah nya disadang ulih diputar semua pengudah semua projek sapat ti benung digaga tembu ila.
Ku iya, bisi empat projek sapat bah digaga dia, enggau sebagi ari projek nya udah tembu seraya ke bukai agi digaga.
“Ambi ke chunto ba genturung pendiau Desa Wira, projek renggat keterubah beungkus RM20 juta udah tembu. Renggat kepenudi mega ngaul ungkus urung RM36 juta lalu kontraktor udah belabuh gawa,” ku iya lebuh dirandau media pengudah ngabas Palan Pengenduh Balai Stapok (PPS) kena Hari Tiga.
Iya nerang, projek nya meri pemaik terus ngagai urung 4,000 peranak ba genturung pendiau nya.
Kelimpah ngaga sistem parit, projek nya mega ngaul ngaga pegung ngandang ai tauka ‘retention pond’ ngambi tetangkupka pemayuh ai lebuh ujan bangat.
“Bisi empat pegung ngandang ai rangkai digaga di Batu Kawa enggau semua pemesai manggai 16 ikar.
“Enti ujan bangat lalu ai niki, pegung tu deka endur ai nya ngandang dulu sebedau anyut ti dipatau rat,” terang.
Ba renggat kepenudi projek nya, ku iya, sapat pemanjai tiga kilometer digaga laban sekeda genturung pendiau semak sungai ba tanah ti baruh endar.
“Enti sapat enda digaga, ai sungai deka terus ngampuh ke genturung pendiau enti tikas ai niki. Kelimpah ari nya, tiga pam ai mega digaga dikena ngepam ai pansut ari pegung,” ku iya.
Datuk Amar Dr. Sim madah, chara mutar penusah bah diatu begunaka perambu komprehensif agi dibanding suba ketegal ai ujan nambah.
“Suba engka semina ngaga parit aja udah chukup, tang diatu penyampau ai kelalu mayuh. Enti nadai pegung ngandang ai, sungai enda tetangkupka penyampau ai ti anyut,” ku iya.
Ngena peluang nya, iya meri terima kasih ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti meri belanja projek nya.
Berebak enggau nya, iya mega meri terima kasih ngagai Sapit Menteri Besai, Datuk Amar Fadillah Yusof ti bejalaika pangku pengawa ba renggat Perintah Besai ba projek besai mutar bah.
Ku iya, Perintah Besai mega ngemendarka projek beungkus RM2.4 bilion dikena ngaga sambung paip Sungai Sarawak ti deka nganyutka 60 peratus ai sungai nya.
“Lebuh tembu ila, tu dikearap ulih mantu ngurangka penusah bah ba genturung pendiau sepanjai Sungai Sarawak sereta meri pemaik ngagai genturung ngelingi nyengkaum Batu Kawa,” ku iya.
Iya chukup andal ke semua projek sapat bah ti benung digaga nya tembu menyana, penanggul bah ti lama udah ngenusah peranak Batu Kawa deka diputar manah.- EDISI UKAS
