Yang di-Pertua Negeri Sarawak Nerima Dua Penemuai Basa
KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar bisi nerima dua penemuai basa ba rumah rasmi iya ditu, Hari Tiga.
Penemuai basa keterubah betuai ke Duta Besai Perancis ke Malaysia, Marc Abensour ti datai berandauka pengawa negap kerejasama ba sekeda sektor strategik.
Entara pekara dikerandau nyengkaum Pelajar enggau Latih Teknikal enggau Vokasional (TVET), industri maritim enggau penerebai, kuasa ulih dikena baru, industri minyak enggau gas mungkur aktiviti huluan sereta hiliran, kelimpah teknologi nangkap, ngena enggau nyimpan karbon (CCUS).
Sama datai ngulu randau nya bini Tun Pehin Sri Dr Wan Junaidi, Toh Puan Datuk Patinggi Fauziah Mohd Sanusi.
Deligit Perancis ba penemuai nya Atase Penyaga Menua Kolonel Stefan Stefancic, Sapit Kaunselor Ekonomi Bouthaina Harfi, Kaunselor Kerejasama enggau Nyaga Main Asal Thierry d’Anna sereta Kaunselor Dagang Jean-François Ambrosio.
Seraya penemuai basa kedua betuai ke Mufti Sarawak ti baru, Datu Khalidi Ibrahim.
Ke penemu, tuju penemuai basa nya meri terima kasih ngagai Yang di-Pertua Negeri Sarawak ti setuju nyiri iya nyadi Mufti baru nengeri tu.
Lebuh berandau, iya ngena peluang nya minda sanding penemu sereta buah runding Tun Pehin Sri Dr Wan Junaidi bekaul pejalai enggau pengawa negap institusyen fatwa di nengeri tu. -EDISI UKAS
