BETONG: Pengawa besikap ngatur Regatta Betong 2026 terus ditegap nengah Aum Penyeraris Regatta Betong Edisyen Taun 2026 Bil. 4/2026 ti diatur di Bilik Aum Opis Pelilih Betong.
Aum nya betuai ke Sapit Menteri Nembiak, Lumba enggau Pemansang Orang Dagang
Sarawak ti mega Kaban Kunsil Nengeri (ADUN) Layar, Datuk Gerald Rentap Jabu ti mega meri perati ngagai pemesai guna kerejasama rat entara semua agensi ngaul diri dikena nentuka pengawa ngatur pekit lumba ai besai nya lanchar.
Iya nerang, penaung Komiti Regatta Betong 2026 iya nya Sapit Premier Sarawak, Datuk Amar Douglas Uggah Embas dibantu Kaban Parlimen Betong, Dato Dr Richard Rapu sereta iya empu.
Ku iya, semua meseti besaup gawa nentuka Regatta Betong 2026 ulih diatur berurun enggau ulih matak penatai bala pengusung ari menua tu enggau menua luar
“Kerejasama semua raban beguna endar ngambi Regatta Betong 2026 ukai semina lanchar, tang ulih matak mayuh pengusung lalu nya deka ngerichah ekonomi menua di Bagi Menua Betong,” ku iya lebuh ngetuai ke aum nya, Hari Satu.
Aum nya mega berandauka bemacham atur nyeraris program nyengkaum atur program, pengelikun, perengkaguna infrastruktur, logistik sereta ngelaku nentuka Regatta Betong 2026 diatur meruan enggau besai empai.
Sama bisi ba komiti pengatur nya pengari ari bemacham agensi nyengkaum Opis Residen Betong, Betong Division Development Agency (BDDA), Opis Pelilih Betong, Spaoh enggau Debak, Kaunsil Sungai Sarawak, Opis Kereja Raya (JKR), Opis Parit enggau Entali Ai (JPS), Opis Bekal Ai Menua Pesisir (JBALB), Kaunsil Pelilih Betong, Unit Komunikasi Awam Sarawak (UKAS), Opis Betanam Betupi enggau sekeda agensi pengelikun enggau komuniti menua nya.
Pengawa nyerarus nya dikearap ulih nentuka Regatta Betong 2026 diatur richah agi sereta meri empas positif ngagai pemansang ekonomi enggau sektor dagang temuai di Bagi Menua Betong.-EDISI UKAS
