KUCHING: Perintah Sarawak majak chakah negap atur trafik mengeri dikena mutar penanggul jalai majak sekut berindik ari mengeri deras mansang, penyampau tubuh peranak enggau entukar nambah di nengeri tu.
Menteri Pengangkut Sarawak, Dato Sri Lee Kim Shin madah, rentayan jalai alun ba mengeri majak diberi perati kelebih agi jalai besai enggau simpang ti sekut ba sekedar mengeri di Sarawak.
Ku iya, belalauka statistik naka ujung taun 2025, Sarawak ngerikod lebih dua juta entukar rejista, tebal agi kerita diri empu enggau motosikal.
“Entukar ti majak nambah tu ngujungka rentayan jalai di mengeri mega majak sekut,” ku iya.
Iya nyebut pekara nya lebuh ngetuai ke Aum Komiti Pengatur Trafik Mengeri Sarawak (SUTMaC) Bil.1/2026 ditu, Hari Tiga.
Iya madah, penanggul trafik sekut mega majak raya maya jam jalai sekut ba sekeda jalai besai sereta simpang besai, lalu nya tau ngeruga pengelikun ba jalai alun.
Berebak enggau nya, projek infrastruktur ti benung digaga baka Sistem Pengangkut Mengeri Kuching (KUTS) nyadi inisiatif beguna dikena negapka sistem pengangkut mengeri timpuh panjai, tang projek engka meri empas enda lama ngagai pejalai trafik sekumbang digaga.
Berindik ari nya, iya madah kea tur trafik ti nemban agi enggau diseraris mayuh agensi bekaul beguna endar.
Ku iya, isu baka kapasiti jalai alun, chara mitigasi penyekut, atur entepan entukar, ngena sistem lampu trafik, aksiden jalai alun sereta pengawa mitigasi begunaka kerejasama rat semua raban.
Aum nya mega digulu Residen Bagi Menua enggau pengari sida, pengari raban bekuasa lokal enggau kaunsil mengeri, Opis Kereja Raya (JKR), Opis Pengangkut Darat (JPJ) sereta pengari Opis Pansik enggau Penerit Adat Trafik (JSPT), Indu Opis Polis Kontinjen (IPK) Sarawak, kelimpah agensi bekaul.
Bela datai Sapit Menteri Pengangkut Sarawak (Langit enggau Jalai), Datuk Dr. Jerip Susil, Sekretari Mendam Opis Menteri Pengangkut Sarawak (MOTS), Datu Wong Hee Sieng, Sapit Sekretari Mendam MOTS, Mohamad Lotfi Tuah, sereta bala pegawai kanan MOTS.
Berebak enggau nya, Lee mega madah ke ba aum sebedau nya, iya udah ngansak Sarawak Multimedia Authority (SMA) enggau MOTS ngelanggur standard enggau atur malin dikena bejalaika Sistem Lampu Trafik Pintar Sarawak.
“Ari input teknikal ari SMA, Standard enggau Atur Malin Sistem Lampu Trafik Pintar Sarawak udah dikeluar rasmi ngagai opis menteri enggau agensi bekaul bulan Februari taun tu,” terang iya.
Ba aum nya, pengari JSPT IPK Sarawak meri penerang pasal statistic penusah bebadi di jalai alun di Sarawak ngambi agensi bekaul ulih ngaga analisis gaya penusah sereta ngaga strategi atur trafik ti nemban.
Kelimpah ari nya, raban bekuasa lokal mega mantaika isu jalai sekut ba menua sida empu nyengkaum pemansang mitigasi sereta projek dikemendar di baruh Langgur Pemansang Malaysia Lumpar Ke-13 (RMK-13).
