TEBEDU: Sekula Primari (SK) Kujang Mawang nyadi sekula keterubah ba sitak Serian ti nerima servis pengangkut nadai bebayar dipelanja Yayasan Sarawak ngambi nembiak lantang agi nurun ke sekula.

Servis nya udah berengkah bejalai kenyau ari 13 Januari 2026 lalu disedia ungkup mai nembiak ari Kampung Pengkalan Amo enggau Kampung Kujang Mawang ke sekula.

Tuju inisiatif tu nyendiaka pengangkut nadai bebayar ngagai nembiak ti napi pemar nurun ke sekula ketegal jauh enggau suntuk perengka pengangkut mensia mayuh.

SK Kujang Mawang dipilih nyadi penerima keterubah program nya di Pelilih Serian belalauka ripot pasap pemar nembiak nurun ke sekula belama.

Lebuh bejaku Kaban Kunsil Nengeri (ADUN) Tebedu, Dr. Simon Sinang Bada, madah ke tuju program nya nyendiaka pengangkut nadai bebayar ti likun ngagai nembiak kelimpah nambah penyampau nembiak datai ke sekula.

Ku iya, inisiatif nya mega ulih ngelempungka tating belanja apai indai ba ungkus pengangkut pulai hari kelimpah negap kaul entara Yayasan Sarawak enggau komuniti menua nya.

“Ari pemisi servis tu, dikearap ulih matak mayuh agi nembiak ari endur ngelingi nurun belajar ba SK Kujang Mawang lalu nambah kualiti pelajar ba kandang menua pesisir,” ku iya.

Iya mega ngarap ke program nya ulih meri empas positif ngagai komuniti pelajar di sekula nya sereta nentuka nembiak ulih datai ke sekula enggau lantang enggau nitih jam.-EDISI UKAS