PANTU: Langgur ngaga siti sekula sekondari (SMK) di Pelilih Pantu terus ditegap lebuh pekara nya dikerandau ba siti aum ti ngempuru bemacham agensi bekaul ngambi nyerenih utai diguna enggau pengawa ti patut dipejalai.

Kaban Parlimen Sri Aman, Dato’ Sri Doris Sophia Brodie maadah, langgur ngaga sekula sekondari di Pantu beguna endar nentuka nembiak di kandang menua pesisir bulih akses pelajar ti muntang enggau lantang agi.

“Projek ngaga sekula sekondari di Pantu ukai semina ngemuntangka bala anak ba kandang menua tu bulih pelajar sekondari, tang deka nyadi penyungkak pemansang modal mensia sereta nambah pengelantang komuniti ditu,” ku iya lebuh ngetuai ke aum nya di Opis Pelilih Pandu, Hari Tiga.

Aum nya mega digulu Pegawai Pelilih Pantu, Raca Mulong, Superintendent Opis Tanah enggau Survei Sri Aman, Michaelsen Nisen, pengari Residen Bagi Menua Sri Aman, pengari Opis Datuk Snowdan Lawan, pegawai ari Opis Pelajar Pelilih (PPD) Sri Aman enggau Simunjan, sereta pengari Palan Servis Balai Ringin enggau Bukit Begunan.

Ba jaku penerang, Raca Mulong madah ke Pantu nya pelilih baru ti diangkat kena 8 Oktober 2021, lalu nya meda penyampau tubuh peranak enggau nembiak ti nambah begunaka perengkaguna pelajar sekondari dia.

Ku iya, nembiak ari Pantu diatu nyau sekula berundang ba pelilih menua ti semak, lalu nya meri pemar lebuh nurun ke sekula enggau perengkaguna pengangkut.

Entara pekara bebatang ti dikerandau ba aum nya nyengkaum peminta ngaga sekula sekondari di pantu, perambu taba ti engkeman, nyendiaka perengkaguna infrastruktur enggau pekara ti patut diadu raban bekaul.-EDISI UKAS