SIMANGGANG: Komiti Pemansang enggau Pengelikun Genturung Pendiau (JKKK) Nanga Skrang, Sri Aman ngatur randau enggau Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis ngambi berandauka sekeda pekara bekaul atur komiti nya.
Tuju randau diatur ba Palan Servis Kaban Kunsil Nengeri (ADUN) Simanggang nya mending empu penemu enggau perambu ari pengari komuniti bekaul atur pengawa JKKK Nanga Skrang.
Ba randau nya, pengari JKKK mega mantaika juluk sida nyiri baru kaban komiti pengatur JKKK belalauka peminta bala kaban komiti protem sebedau tu.
Datuk Francis Harden lebuh bejaku madah, iya sedia mending ke sadang penemu komuniti ti deka milih baru raban pengatur JKKK Nanga Skrang ngambi ulih gawa segulai enggau pemansang Perintah Sarawak.
“Aku merambu JKKK Nanga Skrang ngatur aum enggau nyendiaka minit aum ti ngemasuk pengawa nyiri kaban komiti ti udah dipilih lalu madah pemegai taruh ngatur akaun sebedau dianjung ngagai Opis Pelilih Sri Aman,” ku iya.
Berebak enggau nya, iya mega madah ke perambu ngaga jalai tama ari Jematan Batang Lupar 2 ke menua Nanga Skrang ngambi meransang ekonomi ari pengawa betanam betupi dia tumbuh manah.
Ku iya, perambu pemansang ti dibai perintah nengeri peminta pengari rayat meri perati ngagai aktiviti betanam betupi komersial dikena nambahka penatai pemisi peranak dia.
“Nya alai, aku merambu mai Opis Betanam Betupi Sarawak, Kaunsil Nanas Malaysia sereta sekeda agensi bekaul ngatur randau pemansang betanam betupi ngagai peranak rumah panjai ba menua tu maya haribulan ti deka ditetap ila,” ku iya.-EDISI UKAS
