PADAWAN: Sepenyampau 31 buah rumah di sitak Kunsil Nengeri (DUN) Mambong deka diseruri nengah Projek Program Nyeruri Rumah Miskin Sarawak (PPRMS) Renggat 1 Taun 2026 ti ditaga belabuh April tu.

Sapit Menteri Pengangkut Sarawak (Langit enggau Jalai) ti mega ADUN Mambong, Datuk Dr. Jerip Susil madah, tuju projek nya mantu raban ti begunaka bantu diau ba rumah ti lantang enggau likun agi, kelebih agi ba kandang menua pesisir.

Iya nyebut pekara nya lebuh Program Chabut Undi Projek PPRMS Renggat 1 Taun 2026 ditu, Hari Empat.

Ku iya, pengawa nyeruri rumah disadang ulih dipejalai lengkas pengudah kontraktor nerima surat projek, enggau timpuh projek belabuh dua minggu nyentuk tembu ba tetiap projek dikemendar.

Berebak enggau nya, iya mega meri penerang pasal nambah atur gawa enggau gaya atur baru pejalai projek PPRMS ba Renggat 1 Taun 2026.

Ku iya, tuju nambah manah atur nya nentuka projek lanchar, lurus enggau berurun lalu nya ulih ngerumban bantu ngagai raban diselinting.

Pengawa chabut undi nya diatur nentuka kontraktor ti deka ngaga pengawa nyeruri rumah dipilih di sitak DUN N19 Mambong.

Projek nya dikearap ulih mantu ngadu manah rumah penerima lalu nentuka sida bisi endur diau ti lantang enggau likun agi.-EDISI UKAS