KAPIT: Bisi 15 agensi ba sitak Kunsil Nengeri (DUN) Bukit Goram nerima geran nengah agih belanja Projek Mit Pemansang Menua Pesisir (MRP) sepenyampau RM136,000.

Pengawa nya dipenyadi Sapit Menteri ba Opis Premier Sarawak (Undang-Undang enggau Adat Bumiputera) ti mega Kaban Kunsil Nengeri (ADUN) Bukit Goram, Datuk Jefferson Jamit Unyat kena Hari Lima.

Inisiatif nya sebagi ari pengawa perintah nengeri nyukung atur program ngaul komuniti sereta pemansang ba renggat baruh.

Ku iya, agih belanja nya dikena nyaup agensi enggau gerempung ngatur mayuh program komuniti, aktiviti pengelantang sereta inisiatif pemansang ti meri pemaik ngagai komuniti lokal.

Iya mega ngarap bantu tu ulih negap pangku pengawa organisasyen komuniti ngemujur pemansang sosial sereta nyamin pengelantang peranak ba sitak menua pesisir.

Sama datai, Sapit Residen Kapit, Robert Liman. - EDISI UKAS