KANOWIT: Tuai komuniti dipinta semampai ibuh ke pengelantang peranak dipegai sida nentuka genap isu dalam komuniti ulih diputar chara nemban.
Kaban Kunsil Nengeri (ADUN) Ngemah, Anyi Jana madah, semangat kerejasama entara tuai komuniti beguna amat ngambi genap pekara ngaul peranak ulih diputar begulai ke pengelantang komuniti lokal.
Ku iya, komuniti China ba sitak Ngemah bisi dua penghulu enggau 11 kapitan seraya bisi urung 270 Kapitan enggau Tuai Rumah dichiri dia.
“Nyema bisi komuniti ti kurang mereti ke sekeda pekara, tu nyadi tanggungpengawa kitai nyadi tuai komuniti dikena ngembing sereta mantu sida,” ku iya lebuh Pengawa Merarau enggau Randau Begulai enggau Gerempung KMKK China Ngemah ditu.
Nambah ke nya, iya mega meransang kapitan ti agi bisi peminta projek nengah Program Transfomasyen Menua Pesisir (RTP) ngambi mantaika perambu nengah palan servis iya ba timpuh seminggu.
Anyi mega madah, sebedau tu, iya udah ngagihka belanja RM50,000 ngagai Komiti Pengelantang Komuniti China DUN Ngemah dikena nyeruri enam rumah ti balat jai lalu penyampau sebaka deka diagih sekali da taun tu dikena nampung pengawa mantu raban ti begunaka bantu.
Sama datai iya nya Pegawai Pelilih Kanowit, Cerisologo Sabut. - EDISI UKAS
