SEBAUH: Semua kaban Parti Demokratik Progresif (PDP) dipinta terus ngetan pengelurus enggau semangat beserakup nentuka PDP mengkang tegap sereta dibasa parti bukai.

Menteri Dagang Temuai, Seni enggau Budaya ti mega Presiden PDP Dato Sri Tiong King Sing madah, genap kaban meseti ngesan tanggungpengawa enggau lurus ati lalu nadai niat bukai lebuh masuk parti nya.

“Kitai nyadi kaban dalam parti meseti lurus ati ngesan pangku pengawa enggau bala bukai sereta mensia mayuh. Anang kitai masuk nyadi kaban parti ketegal bisi niat bukai enggau nguntungka diri,” ku iya.

Iya madah munyi nya lebuh bejadi Aum Besai Tiga Taun Sekali Parti Demokratik Progresif (PDP) Bagi Menua N.69 Kemena ti diatur ba Rumah Agnes Mampak, Sebauh, kena Hari Enam.

Ku iya, pengelurus enggau kerejasama rat entara kaban nya pemun nentuka parti terus mansang sereta dibasa orang bukai.

Pia mega, iya meransang kaban parti terus ransing marit kaban baru PDP nentuka parti nya terus mansang enggau mengkang relevan dudi hari.

Aum Besai Tiga Taun Sekali nya mega ngemata pengawa milih komiti baru ungkup PDP Bagi Menua N.69 Kemena ungkup penggal baru.

Ba pengawa milih nya, Datuk Ukar Anak Kelayang sekali da dipilih nyadi Chairman PDP Bagi Menua N.69 Kemena.

Lalu Empaling Tuan dipilih nyadi Sapit Chairman, Mampak Mandaw nyadi Tuai Indu enggau David Bedali nyadi Tuai Nembiak. - EDISI UKAS