KUCHING: Program SAGO Incubator 2026 diperati nyadi pelasar beguna negap orang dagang mikro enggau mit di Sarawak kelebih agi ba sektor pemakai enggau ai irup sereta nyukung pemansang ekonomi inklusif nengeri tu.

Sapit Menteri Nembiak, Lumba enggau Pemansang Orang Dagang Sarawak, Datuk Dr Ripin Lamat madah, dagang mikro, mit enggau jelan pemesai nyadi tiang pemun ekonomi ti beguna endar nyendiaka peluang kereja enggau ngeranchak ekonomi lokal.

Ku iya, lebih 97 peratus dagang di Sarawak datai ari MSME enggau sebagi ari nya bejalaika servis nyengkaum dagang pemakai enggau ai irup.

“Dagang mit suah agi nyadi pengepun inovasyen. Mayuh kompeni mujur diatu bepun ari pelabuhm bansal mit enggau penemu mit ti dikereja enggau ati berani,” ku iya ba aum media SAGO Incubator 2026 Call for Application kena Hari Satu.

Iya madah, program baka SAGO Incubator endang engkeman laban ukai semina meri latih ngagai orang dagang aja, tang ngembing, matau enggau meri akses ngagai makit kebendar.

“Enti orang dagang diberi sistem sukung ti betul, peluang sida mujur deka nambah,” terang iya.

Iya mega madah, chara nya setipak enggau juluk Strategi Pemansang Pengudah COVID-19 (PCDS) 2030 ti meri perati ngagai pengawa negap penau lokal, ngentap penuduk dagang enggau ekonomi tumbuh inklusif di selampur Sarawak.

Berebak enggau nya, iya mega meransang orang ti bisi ati numbuh dagang pemakai ngambi ngena manah peluang ngulu program SAGO Incubator 2026.

Sama datai, Direktor SAGO Group Sdn Bhd, Arif Abdul Rahman, pengari Serakup Pesaka enggau Seni Kulinari Sarawak, Chef Laura Bara Sim enggau Pemungkal iCube Innovation Sdn Bhd, Dato Patrick Liew.-EDISI UKAS