KUCHING: LCDA Sapphire Run 1.0 Begulai Enggau Komuniti ti diatur serimbai ngintu genap taun ke-45 Kaunsil Pemansang enggau Pengintu Tanah (LCDA) mujur matak lebih 800 penyereta ari serap komuniti seraya mandangka timbal manah ngatur aktiviti gaya idup bepengerai.

Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh madah, program belanda ti keterubah diatur nya bisi dua kategori iya nya 4.5 kilometer enggau 10 kilometer lalu nyendia perais besai RM10,000, kelimpah nyadi pelasar ngempung komuniti enggau aktiviti bepengerai, positif enggau inklusif.

"Enti kitai meda program tu nerima timbal ti chukup manah lalu InshaAllah, program baka tu deka ditampung ukai semina ba Kuching tang mega ba endur bukai di selampur Sarawak, nyengkaum udah tu diperambu diatur ba Sarikei bulan Ogos tu," ku iya.

Iya madah munyi nya maya dirandau pengudah bejadi pengawa ngelepas program belanda nya, di Padang Merdeka, ditu tadi.

Datuk Len mega minta mayuh agi agensi bukai ngatur program baka nya dikena meransang komuniti ngambi bagi.

Sama datai, Menijar Besai LCDA, Datu Sr Zaidi Mahdi, Datuk Bandar Dewan Bandaraya Kuching Utara (DBKU) Dato Hilmy Othman, Sekretari Mendam Opis Menteri Pengeraja Asal enggau Pemansang Mengeri (MUDeNR) Datu Abdullah Julaihi, Direktor Opis Kampung Sarawak Datu Hamden Mohammad, Kontroler Kaunsil Pengeraja Asal enggau Rampa Menua Sarawak (NREB) Datu Jack Liam, Direktor Opis Tanah enggau Survei Sarawak Datu Awang Zamhari Awang Mahmood, Menijar Besai Kaunsil Pemansang Kayu Ramu Sarawak (PUSAKA), Datu Zainal Abidin Abdullah sereta Direktor DBKU Ramzi Abdillah.-EDISI UKAS

Pemberita: Nur Nabilla
Gambar: Mohd Safizul Faizad