TEBEDU: Peranak Kampung Pulau Piranuk diatu berasai lantang lebuh projek ngaga Jematan Sungai Nyanuh ti nyambung genturung pendiau ngagai taba rumah panjai baru udah tembu menyana.

Pengawa nyerah projek tembu nya dipenyadi Sapit Menteri Industri Pemakai, Komoditi enggau Pemansang Kandang Menua Sarawak ti mega Kaban Kunsil Nengeri (ADUN) Kedup, Datuk Martin Ben kena Hari Satu.

Projek ngaga jematan nya berengkah 31 Mac 2025 lalu tembu 7 Februari 2026 beungkus RM980,000 digaga nengah Greater Kuching Coordinated Development Agency (GKCDA).

Pengawa dipun enggau penerang projek tembu ari Opis Kereja Raya (JKR) Bagi Menua Serian, dientudi nyerah 'Certificate of Practical Completion' (CPC) ari JKR ngagai Datuk Martin sebedau pengawa ngempat ribin kelai nyerah projek.

Lebuh bejaku, Datuk Martin madah, projek jematan nya meri pemaik ngagai peranak menua, kelebih agi sida lantang mindah sereta nyukung aktiviti ekonomi baka betanam betupi.

Ku iya, perengkaguna nya mega deka ngasuh pengawa ngentak rumah panjai baru peranak Kampung Pulau Piranuk lantang agi digaga sereta nambah pengelantang rayat menua pesisir.

Iya ngarap ke perengkaguna infrastruktur disedia nya ulih dikena manha peranak dia sereta nyadi penyungkak pemansang ekonomi komuniti menua nya.-EDISI UKAS