BAU: Sepenyampau RM1.77 juta agih belanja Projek Mit Pemansang Menua Pesisir (MRP) nengah 'Special Project Monitoring System' (SPMS) Siri 1/2026 disua ngagai 86 penerima di sitak Kunsil Nengeri (DUN) Tasik Biru dikena ngemujur bemacham program enggau aktiviti komuniti.

Penerima agih belanja nya datai ari Komiti Pemansang enggau Pengelikun Genturung Pendiau (JKKK), rumah sembiang, serakup, gerempung ukai dikuasa perintah (NGO) sereta kelab staf agensi kerajaan ba sitak nya.

Chek geran udah disua Sapit Menteri Pengangkut Sarawak (Sungai enggau Tasik) ti mega Kaban Kunsil Nengeri (ADUN) Tasik Biru, Datuk Henry Harry Jinep di Balai Gerempung Bansa Dayak Bidayuh (DBNA) Bau, kena Hari Satu.

Seraya Datuk Henry madah, agih belanja nya sebagi ari inisiatif perintah negap pemansang komuniti enggau ngemujur bemacham aktiviti ba renggat baruh.

Iya ngarap ke agih belanja nya ulih dikena ngatur program ti meri pemaik ngagai komuniti menua nunda tuju asal minta.

Sama datai, Pegawai Pelilih Bau, Eddy Nayoi, Tuai Polis Pelilih Bau, Superintendan Mohd Haide A. Rahman sereta Sekretari Kaunsil Pelilih Bau, Ong Chin Ping.-EDISI UKAS