KANOWIT: Kanowit Cultural Festival 2026 (KCF 2026) deka diatur pengelama 24 hari belabuh ari 8 nyentuk 31 Mei tu, mandangka mayuh aktiviti main asal enggau tradisyen ti bisi pengulih nyungkak ekonomi komuniti lokal.

Pegawai Pelilih Kanowit, Cerisologo Sabut madah, festival nya deka digempuru ba Tebing Ai Kanowit enggau Balai Opis Pelilih nyadi palan besai.

Ku iya, entara pematak besai iya nya Bazaar Gawai ari 10 nyentuk 31 Mei, kelimpah mayuh aktiviti baka Niti Daun, Pekit Betaboh enggau Ngajat, Pekit Bepantun enggau Ramban, Pekit Kumang, Malam Mantar Gawai sereta Lumba Rayat.

“Pengawa bejadi kena 8 Mei ba Panggau Besai Tebing Ai Kanowit lalu disadang dipenyadi Menteri Penyerakup Bansa, Dato Sri Aaron Ago Dagang,” ku iya.

Niti Daun deka ngepun festival kena 8 Mei, dientudi Malam Mantar Gawai kena 23 Mei enggau Lumba Rayat kena 24 Mei.

Dulu ari nya, aum nyendia diri udah diatur ngaul mayuh raban nyengkaum ADUN Ngemah Anyi Jana, pengari ADUN Machan sereta tuai opis enggau komuniti.

Anyi nyemetak madah ke KCF 2026 ukai semina nyaga pesaka budaya mayuh etnik tang mega nyadi pelasar ngeranchak sosioekonomi nengah pengawa nyual produk.

Kelimpah ari nya, Cerisologo madah ke festival nya mega narak penyerakup sereta nyagu Kanowit nyadi palan dagang temuai. - EDISI UKAS