Pemandang ‘Raja Kita’ Nerima Tambal Manah, Nyempil Kaul Rayat Enggau Sejarah Institusyen Diraja
BETONG: Pemandang “Raja Kita” serimbai Ngintu Hari Pengada Rasmi Yang di-Pertuan Agong Ke-17 Renggat Sarawak Taun 2026 nerima timbal chukup manah ari bala pengusung ti ngumbai pengawa nya nyadi pelasar pemadu manah nambahka pemereti ati rayat ke sejarah enggau institusyen diraja menua.
Siku pengusung, Vincent Juma madah, pemandang nya meri penemu ngagai rebak biak pasal sejarah raja-raja Melayu ti majak enda ditemu rayat maya hari.
Ku iya, kereban pemandang ti dipandang nyengkaum gambar enggau dokumentasyen sejarah ulih nambahka penemu pengusung pasal institusyen diraja Malaysia ari kelia nyentuk diatu.
“Pemandang tu mandangka mayuh kisah enggau sejarah raja-raja kitai di Malaysia ari kelia nyentuk diatu.
“Rebak biak diatu mayuh nadai nemu sejarah tu, nya alai, lebuh sida meda gambar enggau kereban ti dipandang, tu meri penemu ti manah ngagai rayat di Betong,” ku iya lebuh dirandau, kena Hari Enam.
Seraya siku da pengusung, Jessica Jelika madah ke pengawa ngatur pemandang nya nyadi inisiatif meri mayuh pemaik laban meri peluang ngagai rayat, kelebih agi peranak Betong, pasal sejarah institusyen diraja.
Iya ngarap ke program baka nya ulih ditandu ninting taun sereta timpuh digaga panjai agi ngambi mayuh agi pengusung ulih datai.
“Pemandang baka tu chukup manah laban meri penemu ngagai mensia mayuh pasal sejarah raja-raja di Malaysia.
“Enti ulih, program baka tu ditandu ninting taun lalu timpuh ngatur digaga panjai agi laban bisi bala ke gawa lalu nadai hari limpang. Aku mega ngarap ke taga program ulih ditusun engkeman agi ila,” ku iya.
Iya mega nerima manah mayuh aktiviti ti diatur sekumbang pengerami nya nyengkaum
konsert rayat ti mujur matak pengusung datai.
Ngenang pekara bekaul, pedagang lokal, Dayang Putri Faqhirah Abang Muhd Fhazil madah, pengerami chukup richah sekumbang program diatur ti mega meri penguntung ngagai orang dagang mit.
Ku iya, asil bejual ti dirikod nambah dibanding sekeda program sebedau tu laban pengusung datai ari menua nya enggau luar Betong.
“Asil kami bejual nambah sekumbang program tu diatur lalu timbal chukup manah dibanding sekeda program ti kala diatur sebedau tu.
“Ukai semina pedagang ari Betong aja, tang bisi ke datai ari Spaoh, Debak enggau Sri Aman nyendiaka bansal ditu. Penatai bala pengusung endang mantu nambahka asil dagang mit kami,” ku iya.
Iya ngarap ke Perintah Sarawak deka nandu program besai baka nya ila laban meri penguntung ukai semina ngagai pedagang aja, tang meri peluang ngagai rayat enggau nembiak ngulu mayuh aktiviti disedia.
“Program baka tu meri pemaik ngagai semua raban laban ukai semina mantu pedagang aja, tang mega ngidupka menua sereta matak pengusung ngambi sama ngerichah pengerami,” ku iya. -EDISI UKAS
