KUALA LUMPUR: Sarawak diatu meri perati ngagai pengawa ngenegapka semua ekosistem digital pengudah nyapai pemansang nyengala ba bungkur internet di selampur nengeri nentuka pemansang teknologi terus nyukung ekonomi tumbuh enggau pengelantang rayat.

Menteri Utiliti enggau Telekomunikasyen Sarawak ke mega Chairman SACOFA, Dato Sri Julaihi Narawi madah, selinting pemansang digital nengeri diatu ukai semina ngerembaika bungkur aja, tang meri perati ngagai pekara kualiti servis, peneguh rentayan enggau penau digital ti inklusif agi.

“Kelimpah pemansang infrastruktur fizikal, Sarawak mega meri perati besai ngagai pengawa ngenegapka ekosistem digital ti disukung rentayan penyambung ke bisi diatu. Tu nyengkaum nambah penyikap infrastruktur data, meransang pengawa ngena teknologi remang (cloud), sereta ngasuh kaul enggau integrasyen ti sikar agi entara perintah, dagang enggau operator servis.

“Renggat pemansang nangkan tu ukai semina ngerembaika bungkur aja, tang mega nyelinting pengawa nentuka kualiti servis, peneguh rentayan enggau penau digital ditegap ba semua ekosistem,” ku iya.

Iya nyebut pekara nya lebuh bejaku ba Pengawa SACOFA Networking Hi-Tea 2026 ditu, Hari Lima.

Berebak enggau nya, ku Dato Sri Julaihi, SACOFA majak bejalaika pengawa nyadi tiang sukung infrastruktur telekomunikasyen Sarawak enggau ngatur 12,000 kilometer rentayan gentian optik enggau 1,680 tiang pemanchar telekomunikasyen di selampur nengeri.

Ku iya, pangku pengawa SACOFA diatu mega ngerembai ari semina operator infrastruktur ngagai pemuntang pengawa strategik ke nyukung integrasyen rentayan, ngena manah penyikar sistem sereta ngerumban pengawa mutar penyambung ba mengeri enggau menua pesisir.

Ku iya, pekara nya seriris enggau juluk Perintah Sarawak nentuka infrastruktur digital nengeri tetap teguh, likun enggau sedia nangkup peminta ekonomi digital dudi hari.

Berebak enggau nya, iya madah ke pemansang digital ti inklusif majak dikemerat perintah nengeri ngambi pemanah teknologi ulih diasai semua, nyengkaum peranak menua pesisir, institusyen pelajar, perengkaguna pengerai enggau dagang mit.

Iya mega madah, pemansang dijapai naka diatu ngayanka pemesai guna kerejasama rat entara perintah, industri enggau bakih strategik dikena ngenegapka agenda penyambung Sarawak.-EDISI UKAS