RoboClash Challenge 2026 Ngansah Penau Teknologi Rebak Biak Sarawak Nipak PCDS 2030
SERIAN: RoboClash Challenge 2026 majak nyadi pelasar strategik ngansah enggau pemansang penau teknologi rebak biak Sarawak setipak enggau juluk Strategi Pemansang Pengudah COVID-19 (PCDS) 2030 sereta peminta ekonomi dudi hari ti disungkak teknologi enggau inovasyen.
Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, pengawa nguasa bidang robotik, ‘artificial intelligence’ (AI) enggau automasi diatu beguna endar dikena nempa pengereja landik ti tetangkupka peminta industri dudi hari.
Ku iya, teknologi nya beguna endar ba pemansang kuasa beresi nyengkaum hidrogen gadung, ngintu rampa menua sereta betanam betupi pintar ti majak nyadi pemansang diselinting Sarawak.
“Robotik, AI enggau automasi ukai siti pekara ti semina dibacha ba bup teks tauka nyadi ba makmal besai ba menua luar aja. Tu mih teknologi kebendar ti benung nempa pemujur Sarawak diatu,” ku iya lebuh bejadika RoboClash Challenge 2026 Renggat Kepenudi di Dewan Masyarakat Serian kena Hari Enam.
Pekit masuk edisyen ketiga nya diatur ba tiga endur iya nya Bintulu, Sri Aman enggau Serian, ti digulu lebih 350 nembiak ari selampur Sarawak ke bepekit ba mayuh pekit bepelasarka robotik, dron enggau mutar penanggul kreatif.
Ba renggat kepenudi pekit, bala penyereta bepekit ba empat kategori besai iya nya Sumo Robot Challenge, Mini Drone Obstacle Race, RoboMaster Challenge enggau Drone Soccer Competition ti nguji pengelandik teknikal, strategi, kreativiti sereta kereja siti tim.
Dato Sri Roland Sagah madah, bala nembiak ti datai ari selampur nengeri nurun bepekit nya pengulih besai penau teknologi ti dikembuan anak Sarawak nadai ngira geografi tauka tirai juru.
Iya madah, pengawa ngatur RoboClash di sekeda bagi menua ngasuh mayuh agi nembiak ulih nurun bepekit, lalu nentuka pemansang penau teknologi ulih diatur inklusif ba selampur nengeri.
Tambah mega ku iya, pekit nya ukai semina kelang bepekit aja, tang pelasar belajar ti ngasuh nembiak ulih ngena penemu ti dipelajar ba dunya nyata.
“Pekit baka RoboClash beguna endar laban nguji utai dipelajar ba kelas lalu dikena ba dunya nyata. Enti kita nengkebang robot, putar ke penanggul teknikal tauka setipak ke enggau strategi maya bepekit, tu mih bansa runding enggau pengepuh ti diguna ba Industri 4.0,” ku iya.
Dato Sri Roland madah, bala penyereta RoboClash sehari nya nyadi rebak ti deka ngemansangka mengeri pintar, sistem kuasa beresi sereta teknologi baru ke deka nempa Sarawak dudi hari.
Iya andal ke nya ulih ngenegapka agenda pemansang penau nengeri ari nempa mayuh agi injinia, saintis, teknologis enggau innovator lokal ti sedia gawa ke pemansang Sarawak manggai 2030.
Sama datai, Sekretari Mendam Opis Menteri Pelajar, Inovasyen enggau Pemansang Penau Sarawak Datu Adana Jed enggau Pemangku Mandal Canselor University of Technology Sarawak (UTS) Prof Dr Mohammad Shahril Osman.-EDISI UKAS
