BETONG: Jematan Sungai Krian ti dipenyadi enggau ulih ditengah diatu kelai siti da pemujur besai negap rentayan infrastruktur menua pesisir ba Sarawak seraya ngamat juluk peranak ba Pusa enggau Kabong ti sebedau tu bepanggai ngagai servis feri.
Sapit Premier Sarawak Datuk Amar Douglas Uggah Embas madah, Jematan Sungai Krian nya jematan kedua ari semilan jematan ti ditaga tembu taun tu ke alai Jematan Igan ti keterubah tembu enggau ulih ditengah kena 16 Mac tu tadi.
Ku iya, pemujur nya bukti komitmen perintah nengeri diiring Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti ukai semina ngelanggur pemansang tang mega nentuka genap projek dipejalai ke pemaik rayat.
"Inisiatif pemansang baka projek Jalai Tebing Tasik ti deka disambung enggau Jalai Besai Pan Borneo Sarawak nyadi penyungkak besai ngemansang menua pesisir.
“Batang tuju pengawa ngaga jematan nya dikena nambah kualiti idup rayat, kelebih agi ngemuntang akses ngagai pelajar, pengerai sereta servis agensi perintah,” ku iya.
Iya madah munyi nya maya Pengawa Mantar Bejadi Jematan Sungai Krian, Hari Tiga.
Ku iya agi, jematan ti ulih ditengah nya pengawa ngamat semaya ngagai peranak lokal enggau pengari rayat nentuka nya ulih ditengah sebedau Hari Raya Aidilfitri ti deka datai.
Nambah ke nya, Datuk Amar Douglas Uggah Embas ngelalau peranak lokal ngena perengkaguna ti disedia enggau manah dikena ngubah tikas idup sida.
Sama datai, ADUN Kalaka Mohammad Duri, ADUN Beting Maro Dato Razaili Gapor, ADUN Krian Friday Belik, Kaban Parlimen Betong, Dato Dr. Richard Rapu, Kaban Parlimen Batang Lupar Mohamad Shafizan Kepli, Senator Dewan Negara, Senator Pele Peter Tinggom, Sekretari Mendam Opis Menteri Infrastruktur enggau Pemansang Penyangkai Kapal Sarawak, Datu Chiew Chee Yau, Direktor Kereja Raya Sarawak, Datu Adj. Prof. Ir. Ts. Gs. Br. PMr. Dr. Cassidy Morris, Residen Bagi Menua Betong, Datu Richard Michael Abunawas; sereta Sekretari Politik Premier Sarawak, Roselin Mapong.-EDISI UKAS
