SIBU: Bantu pengelantang nengeri ngena digital nyau majak diterima lebuh lebih 90 peratus penerima Bantu Barang Diguna Pemun Sarawak (SKAS) 2026 udah rejista enggau ngena SPay Global.
Sekretari Politik Premier Sarawak, Sayed Azmee Wan Junaidi madah, sistem digital nyau mayuh dikena lalu nya ngasuh bantu ulih diberi ampat, betul enggau beselinting.
Iya nyebut pekara nya lebuh ngari ke Kaban Kunsil Nengeri (ADUN) Nangka, Datuk Dr. Annuar Rapaee ba Pengawa Ngelanchar SKAS 2026 Renggat Sitak Kunsil Nengeri (DUN) Nangka di Bisonte Grocer & Deli Supermarket, kena Hari Tiga.
Ku iya, chara digital nya ukai semina ngemuntangka penerima aja, tang meri peluang ngagai perintah meri mayuh agi bantu bukai ngena chara ti efisien agi dudi hari.
“Ngena pelasar baka SPay Global tu ulih ngerumban pengawa meri bantu sereta nentuka bantu datai ba raban diselinting,” ku iya.
Berebak enggau nya, iya madah ke SKAS 2026 mega ditegap enggau nambah bantu ungkup semua kategori penerima dikena mantu rayat napi belanja idup ti niki.
Ku iya, penyampau bantu kategori ruang bilik ditambah ari RM800 ngagai RM950, seraya orang tuai nambah ari RM400 ngagai RM500 lalu kategori bujang ari RM250 ngagai RM300.
Iya mega madah, bantu deka diberi berenggat dalam tiga renggat iya nya Mac, Mei enggau November dikena mantu penerima ngatur belanja enggau berurun agi.
