PANTU: Berita manah dibantai Kaban Parlimen Sri Aman, Dato Sri Doris Sophia Brodie pasal perambu ngaga siti sekula sekondari baru di sitak Pelilih Pantu nyata nerima timbal manah ari peranak dia.
Perambu nya ngaga Sekula Sekondari (SMK) Pantu udah dibantai iya lebuh bejadika Aum Besai Ninting Taun Serakup Apai Indai enggau Pengajar (PIBG) Sekula Primari (SK) Pantu 2026, ditu, kena Hari Lima nyin tadi.
Siku pengereja ba luyang batu arang dia, Steward Jupong, 32, lebuh dirandau madah, perambu nya endang udah lama dianti peranak menua nya laban bala anak sida nyau jauh enti nampung sekula sekondari.
“Bala anak di Pantu nampung pelajar sekula sekondari di SMK Melugu, ti pemadu semak, dientudi SMK Sri Aman, SMK Saint Luke enggau SMK Simanggang.
“Laban kelalu jauh, sida nyau diau bemalam ba buding. Nya kebuah, perambu ngaga SMK Pantu endang diterima manah ngambi anak ditu ulih belajar semak agi enggau rumah sereta ngelimat belanja pengangkut,” ku iya.
Steward mega madah, perambu ngaga SMK Pantu deka ngasuh bala nembiak ransing agi ngiri penemu enggau apai indai ulih ngembing anak sida belajar ninting hari.
Seraya Tuai Rumah Selantik Ili, Hearold Ernest madah ke perambu ngaga SMK Pantu nya endang engkeman dikena ngeranchak pemansang modal mensia ba sitak nya.
“Nyadi tuai komuniti, perambu tu ba penemu aku ukai semina meri pemaik ngagai rebak biak aja, tang mega ngerandang peluang kereja ngagai peranak di sitak Pantu.
“Nya alai, kami ngarap ke projek tu ulih digaga jampat ngambi ulih nambah akses pelajar di kandang menua pesisir enggau negap pemansang peranak menua nya,” ku Hearold.
Sebedau tu, Dato Sri Doris lebuh Aum Besai PIBG SK Pantu madah ke perambu ngaga sekula baru nya udah dibantai ke iya ba Aum Parlimen lalu diatu ba perambu laban bekaul.
Ku iya, pekara nya mega dikerandau begulai enggau Opis Pelilih Pantu sereta bala tuai raban bansa menua ba siti aum diatur ba Bilik Aum Opis Pelilih Pantu, empai lama.
Taja ngaga SMK Pantu engka enda ulih digaga jampat tang perambu nya udah digaga lalu pengawa ngamatka langgur penemu deka terus ditandu.-EDISI UKAS
