SIBU: Juluk Institut Latih TCCS Marine Sdn Bhd nyau deka ngambi 2,000 nembiak taun tu berindik ari nyau majak mayuh nembiak ti rindu ngulu latih kapal model.
Direktor Pelajar TCCS Marine Sdn Bhd, Kapten Budyuzaman Abu Seman, madah ke juluk nya nunjukka apai indai enggau nembiak majak andal ke tunga kuing institut latih nya nempa pengereja landik ti sedia nangkup pemar teknologi.
“Lebuh baru ditumbuh taun 2024, urung 300 ngagai 400 aja lalu ba taun nyin tadi, penyampau nya manggai 1,000 lebih nembiak, lalu taun tu kitai melaba nyau deka 2,000.
"Alhamdulillah, ari taun ke taun, penyampau nembiak majak nambah. Kami mega deka meri terima kasih ngagai raban ti udah meri sukung enggau mantu nambah penyampau nembiak ke TCCS," ku iya.
Iya nyebut jaku nya lebuh dirandau ba Program Buka Puasa TCCS di Udak Ballrooms kena Hari Dua.
Iya mega madah, penyampau tubuh ti nambah nya datai ari sukung tegut semua raban nyengkaum Opis Tasik Malaysia ti mayuh nyaup TCCS sekumbang bejalaika pengawa.
Berebak enggau nya, iya mega madah ke pemesai guna mekuh teknologi ba silibus latih kapal seriris enggau pemansang industri kemaya hari.
“Diatu, kitai enda baka suba laban teknologi majak ngerembai lalu pekara tu begunaka nembiak ti bisi disiplin sereta bisi penemu ti entap, kelebih agi ba pengelikun, kereban moden AI enggau ke bukai,” terang iya.
Iya madah baru, chara ngena mayuh disiplin penemu ditarak dikena nempa nembiak ti ukai semina landik ba pengawa belayar aja, tang sedia mangku mayuh pangku pengawa ba kapas.
Sama datai, Direktor Pengatur Institut Latih TCCS Marine Sdn Bhd, James Ho.-EDISI UKAS
