KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar disempulang bini, Toh Puan Datuk Patinggi Fauziah Mohd Sanusi ngulu Pengerami Buka Puasa enggau bala tuai opis sereta agensi di Dewan Santapan, Surau Astana Sarawak, ditu, Hari Tiga.

Penatai seduai ba pengerami nya disambut Sekretari Perintah Sarawak, Datuk Amar Mohammad Abu Bakar Marzuki enggau bini, Dato Baduyah Bujang.

Sama datai, Luyar Besai Sarawak, Dato Sri Saferi Ali, Sapit Sekretari Perintah Sarawak (Operasyen), Datu Hii Chang Kee, Sapit Sekretari Perintah Sarawak (Administrasyen), Datu Felicia Tan Ya Hua sereta bala tuai opis bukai.

Pengerami dipun enggau buka puasa bebala mayuh, dientudi sembiang Maghrib betuai ke Imam Besai Sarawak Sahibul Fadilah Dato Mustapha Kamal Ahmad Fauzi, sebedau Tun Pehin Sri Dr Wan Junaidi enggau bini makai.

Tembu makai, Tun Pehin Sri Dr Wan Junaidi enggau bala bukai udah nya sembiang Isyak enggau terawik bebala mayuh, sebedau pengerami tembu enggau makai moreh sebedau mupuk pulai.

Yang di-Pertua Negeri Sarawak enggau bini meri terima kasih ngagai bala tuai opis enggau pengari ari mayuh agensi perintah, serakup enggau agensi media ti bisi datai. -EDISI UKAS