Premier Sarawak Ngemata SACOFA Nyua Zakat RM2.93 Juta Ngagai Wang Turu Baitulmal Sarawak
KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg ngemata pengawa nyua zakat dagang SACOFA Sdn Bhd penyampau RM2.93 juta ngagai Wang Turu Baitulmal Sarawak (TBS) ungkup taun belanja 2025 di Kompleks Satria Pertiwi, ditu, kena Hari Empat.
Zakat nya disua Menteri Utiliti enggau Telekomunikasyen Sarawak ti mega Chairman SACOFA, Dato Sri Julaihi Narawi ngagai Yang Dipertua Kaunsil Islam Sarawak Datuk Misnu Taha.
Pemeri ari SACOFA nya ngayanka kompeni nya bejalaika tanggungpengawa korporat sida sereta sukung ngagai program ngintu pengelantang rama di Sarawak.
Nya dikena mantu raban ti begunaka bantu enggau nambah pengelantang komuniti.
Zakat nya mega dikena nangkup tanggungpengawa syariah SACOFA enggau mandangka kompeni nya ransing ngaduka pemansang sosioekonomi raban di Sarawak, kelebih agi nengah program pelajar, ngintu pengelantang enggau komuniti ti digempung TBS.
Penyampau zakat disua SACOFA ungkup taun belanja 2025 nya bisi nambah dibanding RM2.90 juta ti diberi ba taun 2024.
Sama datai, Kaban Kaunsil Direktor SACOFA sereta Tuai Pegawai Eksekutif SACOFA Jafer Sadig Abdul Lathiff. -EDISI UKAS
