KAPIT: Projek ngaga serungap atap ba Rumah Mansai, Nanga Sengkabang, Sungai Majau nyadi inisiatif besai empas ti nambah pengelantang peranak rumah panjai nya.

Projek nya tembu ngayanka perintah seruran ransing gawa nyendiaka perengkaguna pemun ba menua pesisir.

Pengerami bejadi udah dipenyadika Sapit Menteri Digital ti mega Kaban Parlimen Hulu Rajang, Datuk Wilson Ugak Kumbong, kena Hari Tiga.

Lebuh bejaku, iya madah ke projek nya ukai semina nambah pengelantang aja, tang peranak lantang mindah enggau ngereja pengawa besehari-sehari.

Berebak enggau nya, iya mega madah ke sekeda perengkaguna bukai ti dipinta peranak, nyengkaum ngaga sambung tali karan baru, nirika tiang pemanchar telekomunikasyen ngambi arus internet manah agi sereta perambu melakin jalai ngambi badu lichin maya musin pengujan.

Ku iya, semua peminta tu deka dibantai ngagai agensi bekaul ungkup atur pengawa bukai.

Seraya Tuai Rumah Mansai meri terima kasih ke penyiru perintah enggau pengeran bala tuai ngundang rayat ba menua.-EDISI UKAS