KUCHING: Komuniti Iban sekali da diberi pengandal nyadi tuai pengawa Ngintu Gawai Dayak Renggat Sarawak 2026, nyengkaum ngetuai ke batang pengerami Niti Daun ti deka diatur 20 Jun tu di Kuching Waterfront.

Pekara nya dipadah ba Aum Keterubah Komiti Mit Niti Daun sehari tu ti ngaul mayuh pengari agensi perintah, gempung ukai dikuasa perintah sereta komuniti bukai.

hairman Komiti Mit Niti Daun ti mega Sapit Menteri ba Opis Premier Sarawak, Datuk Jefferson Jamit Unyat lebuh bejaku meri terima kasih ke pengandal ti udah diberi raban Komiti Besai Ngintu Gawai Dayak Renggat Sarawak 2026 ngambi ngetuai ke pengawa nya.

Ku iya, tuju pengawa bejalai bebala mayuh ukai semina ngerichah pengerami Gawai Dayak aja, tang nyadi pelasar mantaika pengaya budaya, adat asal enggau identiti raban bansa Dayak di Sarawak nengah bemacham kontinjen ti ngambi bagi.

“Pengawa bejalai bebala mayuh ukai semina lambang penyerakup aja, tang nyadi pelasar mandangka penyelai pesaka budaya raban bansa Dayak ngagai mensia mayuh,” ku iya.

Iya mega madah ke pengawa bejalai bebala mayuh deka majak diatur ba Kuching Waterfront ti nyadi palan ditapat ninting Gawai Dayak.

Nikal ngagai pengawa ngatur sebedau tu, raban bansa Bidayuh ti nyadi tuai pengawa ba taun 2024 mujur ngempuruka 111 kontinjen, seraya raban bansa Orang Ulu ngerikod 91 kontinjen ba taun 2025.

Ungkup taun tu, komiti nyelinting 99 kontinjen dikena ngerichahka agi Niti Daun.

Aum nya mega beradauka perambu tumu, nyeraris pengawa enggau atur strategik nentuka lanchar, berurun enggau nyapai tuju.

Niti Daun disadang nyadi entara batang pengerami Ngintu Gawai Dayak Renggat Sarawak, lalu ngemau semangat penyerakup enggau temegah ke pesaka budaya pupu bansa di nengeri tu.

Sama datai, Kaban Kunsil Nengeri (ADUN) Engkilili ti nyadi Sapit Chairman II, Dr Johnnical Rayong, Sekretari Mendam Opis Menteri Industri Pemakai, Komoditi enggau Pemansang Kandang Menua ti nyadi Sekretari Kereja, Datu Sirai Daha sereta Pegawai Khas Opis Menteri Pengeraja Asal enggau Pemansang Mengeri (MUDeRN), Leftenan Jeneral (B) Datuk Stephen Mundaw.-EDISI UKAS