KUCHING: Perintah Sarawak naka ulih nentuka anak nengeri tu enda tinggal ba pelajar semina ketegal suntuk belanja laban pelajar nyadi kunchi mobiliti sosial.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, nengah inisiatif Skim Pelajar Tinggi Pechuma Sarawak (FTES), perintah nengeri meri peluang ngagai bala anak Sarawak ari ruang bilik seranta enggau jelan penatai pemisi nampung pelajar ba institusyen pelajar tinggi enggi Perintah Sarawak ti enda ditating belanja.

“Kitai deka nempa injinia, saintis, pakar teknologi, lutur, pengajar enggau profesional ba mayuh pengawa ti deka nyungkak pemansang Sarawak jeman diatu enggau dudi hari,” ku iya ba Pesan Khas serimbai Hari Raya Aidilfitri 2026.

Berebak enggau nya, ku iya, Perintah Sarawak majak negapka sektor kuasa ulih dikena baru, nyengkaum pemansang kuasa hidro, solar enggau hidrogen, nyadi pugu ngagai ekonomi gadung ti meruan.

“Kitai dekaka Sarawak nyadi hab kuasa beresi serantau, matak pemeranak puku bekualiti tinggi sereta nyendia peluang pengereja landik ungkup rayat," ku iya. -EDISI UKAS