KUCHING: Perintah Sarawak mujur ngaga tembu 924 unit rumah nengah agenda pengawa berumah ulih dibeli ari taun 2021 nyentuk 2025.

Ku Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, ari penyampau nya, 770 unit nengah program Rumah Spektra Permata (RSP) seraya 154 unit nengah Projek Rayat (PR).

“Rumah tu mujur tembu ba mayuh bagi menua di Sarawak nyengkaum Kuching, Betong, Sarikei, Sibu, Mukah, Miri enggau Limbang iya nya mungkur kandang mengeri, semak mengeri enggau menua pesisir,” ku iya ba Pesan Khas serimbai Hari Raya Aidilfitri 2026.

Ku iya, di Bagi Menua Kuching, entara projek ti udah tembu nyengkaum RSP Kampung Pasir Panjang, Pasir Pandak/Pasir Salak, Rumah Ulih Dibeli (RMM) di Darul Hana, sereta projek di Lundu, Sematan enggau SPK Tebakang Melayu seraya Bagi Menua Betong bisi projek dipejalai di Kampung Spaoh enggau SPK Maludam Renggat 1.

Kelimpah ari nya, projek di Sarikei (SPK Susur Jambu), Sibu (Kemuyang), Mukah (Hilir Dalat enggau Balingian), Miri (Majelin enggau Permyjaya III) sereta Limbang (RMM Ranggau) bela udah tembu.

Nengah Projek Rayat, bisi 154 unit rumah udah digaga tembu ba sekeda endur strategik nyengkaum Santubong di Kuching, Kampung Hulu Kabong di Betong, sereta Tian Matu enggau Igan di Mukah.

“Projek tu ukai semina ngaga rumah aja, tang nyadi lambang perintah nentuka rayat seranta enggau jelan penatai pemisi bisi rumah ti lantang, likun enggau ulih dibeli.

“Perintah endang mereti ke rumah ukai semina endur ngenduh aja laban nya utai diguna pemun ti numbuhka ruang bilik tegap, rampa ti lantang enggau pengidup rebak dudi tejamin agi,” ku iya.

Nya alai, ku iya, Perintah Sarawak deka terus nentuka agenda pengawa berumah rayat terus dikemerat, seriris enggau juluk kitai deka ngangkatka tikas idup enggau pengelantang rayat ti inklusif. -EDISI UKAS