KUCHING: Perambu ngangkatka Pelilih Mit Sungai Asap nyadi Pelilih Apau Koyan deka diperunding nyadi pengawa strategik negap pemansang menua pesisir.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perambu nya ukai semina ubah status administrasyen aja, tang nyerangkung semua pengawa dikena nambah penau bejalaika servis perintah ngagai rayat.

Ku iya, aku nya deka ngasuh pemansang dipejalai enggau berurun agi sereta beselinting, kelimpah ngerumban pejalai projek sereta nangkup peminta peranak menua nya.

“Ari aku tu, kitai ulih merambu pemansang ti berurun agi, nambah penau ngatur pengawa lokal sereta ngerandang mayuh agi peluang ekonomi ngagai peranak menua,” ku iya ba Pesan Khas serimbai Hari Raya Aidilfitri 2026.

Ngenang pekara sama, iya nerangka Perintah Sarawak andal ke pengawa negap tusun administrasyen ba kandang menua ulu deka meri empas positif ngagai pengelantang rayat, kelebih agi nentuka akses ngagai servis pemun ulih ditambah.

“Perintah Sarawak seruran naka ulih nentuka kandang menua pesisir enggau menua ulu enda dikelaung ari arus pemansang laban tetiap menua bisi pengulih kediri, lalu udah nyadi tanggungpengawa kitai ngena maksimum pengulih nya ke pengelantang rayat,” ku iya. -EDISI UKAS