Yang di-Pertua Negeri Sarawak Tun Pehin Sri Dr Wan Junaidi Tuanku Jaafar madah, pemujur pemansang Sarawak ukai semina bekaul politik tauka etnik aja, tang ngayanka pemeruan budaya, penegap sosial enggau penyerakup rayat pupu bansa di nengeri tu.

Ku iya, konsep 'Segulai Sejalai' ti mai reti selubang penemu nyadi pugu penyerakup di Sarawak, ke alai orang Islam ngemeran prinsip hdup begulai enggau etnik bukai baka Iban, Bidayuh, Orang Ulu, Melanau, India, China enggau bansa bukai.

“Ulah orang Islam Sarawak nyadi siti jematan laban ulih ditengah semua.

“Ambi ke chunto, gempung baka Harakah Islamiah Islam Sarawak (HIKMAH) besai pangku pengawa ngintu pengelantang enggau pelajar moral rayat pupu bansa baka meri bantu ngagai raban tasah bah enggau angus,” ku iya ba Pesan Khas Hari Raya Aidilfitri 2026.

Tun Pehin Sri Dr Wan Junaidi mega madah, penyerakup orang Islam enggau rayat bukai ngasuh politik tegap enggau meri pengelantang sosial di Sarawak lalu nyadi sapat ari polarisasi ti suah nyadi di luar Sarawak.

Iya nerang, tu setipak enggau visyen pemansang nengeri laban Sarawak nyadi chunto pemadu manah Diri Sebilik, ngasuh kitai nyelai maya hari besai ke alai pengerami Aidilfitri mega berasai ba bala menyadi etnik enggau pengarap bukai.

“Aku pechaya ari penyerakup tu Sarawak deka majak nyungkak ekonomi gadung, kuasa ulih dikena baru enggau transformasyen digital ungkup pengelantang rebak dudi," terang iya. -EDISI UKAS