PAKAN: Sepenyampau 41 Komiti Pemansang enggau Pengelikun Genturung Pendiau (JKKK), Biro Indu, Serakup Apai Indai enggau Pengajar (PIBG) sereta serakup loka; ba sitak Kunsil Nengeri (DUN) N.47 Pakan nerima agih belanja Projek Pemansang Mit Menua Pesisir (MRP) enggau semua agih belanja manggai RM420,000 dikena negap aktiviti pemansang komuniti.
Kaban Kunsil Nengeri (ADUN) Pakan Tan Sri William Mawan Ikom madah, agih belanja nya ngayanka perintah seruran marit komuniti ti regas ngatur bemacham aktiviti pemansang ba renggat komuniti.
“Agih belanja tu patut dikena manah ba tuju ti betul ngambi semua rayat ulih ngasai pemaik iya.
“Aku deka madah, agih belanja tu anang salah guna nyentuk tau ngasuh diri serumah belaya, kelebih agi ba rumah panjai,” ku iya ngelalau.
iya nibar ke jaku lalau nya ba Pengawa Nyua Chek MRP ngagai JKKK, Biro Indu, PIBG sereta serakup lokal ba sitak DUN Pakan, empai lama.
Tan Sri William Mawan mega nerang, pemansang ba kandang menua pesisir enda tau dibanding enggau kandang mengeri ketegal bida ari sukut utai diguna enggau penanggul ba menua nya.
Nya alai, iya minta rayat anang jampat alah ajum jaku petenah sebelah media rama ti nguji bejai pengawa perintah ti bejalaika pemansang ba sitak nya.
Berebak enggau nya, iya meransang pengempu tanah ngereja tanah sida dikena nambah asil enggau ekonomi diri sebilik, lalu nyeliah sektor betanam betupi di Pakan terus tinggal.
Sama datai, Pegawai Pelilih Pakan, Mohd Irwan Abdullah @ William Manggoi sereta bala tuao opis enggau peranak dia. -EDISI UKAS
