KUCHING: Proses magi baru sitak dipejalaika Komiti Besai Pengawa Bepilih Malaysia (SPR) diatu pengawa ti beguna endar dikena ngamatka tambah 17 penuduk sitak Kunsil Nengeri (DUN) Sarawak ti udah dikemendar, lalu nambah penyampau semua penuduk ari 82 ngagai 99.

Speaker DUN Sarawak, Tan Sri Datuk Amar Mohamad Asfia Awang Nasar madah, pengudah dikemendar ba renggat DUN, tanggungpengawa udah nya bepanggai ba bidang kuasa SPR bejalaika tungkap enggau proses magi baru sitak ba renggat baruh.

Ku iya, naka diatu, DUN Sarawak apin nerima sebarang ripot rasmi ari SPR bekaul pengawa nuku enggau perambu magi baru sitak ungkup 17 penuduk baru nya.

“Pengudah ripot ari SPR diterima, perambu magi baru sitak deka dipandang ngagai mensia mayuh dikena meri awak ngagai sebarang bantah sebedau digazet, udah nya dibai ke Parlimen ungkup dikemendar.

“Tambah penuduk Kunsil semina begunaka sukung majoriti mudah lalu dipelaba nadai napi sebarang penanggul. Taja pia, tambah penuduk Parlimen begunaka sukung dua pertiga kaban Parlimen,” terang iya.

Iya nerang pekara nya lebuh dirandau pemberita rambau ngabang Pengerami Nerima Pengabang Hari Raya Aidilfitri ba rumah Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh, ditu, Hari Minggu.

Berebak enggau nya, iya nyemetak madah ke faktor geografi patut diberi perati ba proses magi baru sitak di Sarawak lalu enda ulih semina bepanggai ba penyampau tubuh peranak aja.

Berindik ari nya, iya ngarap ke raban Perintah Besai enggau ulih mereti ke penyelai geografi nengeri tu lebuh bejalaika proses nya.

Ngenang pekara bukai, iya madah ke timpuh Kabinet Sarawak naka Februari 2027, tang tau dipadam sebarang maya ari Yang di-Pertua Negeri ari sanding penemu Premier Sarawak.

“Kuasa madam Kunsil dipegai Yang di-Pertua Negeri, seraya Premier semina meri sanding penemu enggau bekunsi berita,” ku iya.

Sama datai, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan sereta Sapit Menteri Kebun Dandang Besai enggau Komoditi, Dato Sri Huang Tiong Sii. – EDISI UKAS