KUCHING: Perintah Sarawak deka bejalaika sistem ngatur teda pepejal ungkup pengawa timpuh panjai ngintu rampa menua sereta enda kelalu bepanggai ba taba muai uras di nengeri tu.
Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh madah, nya entara inisiatif beguna ti benung dilangkar berindik ari ubah klimet enggau gaya hari ekstrem ti disadang nyadi kandang berapa bulan deka datai.
“Pansik kepenudi benung digaga lalu deka dibantai ba Aum Perintah Nengeri ungkup dikemendar lalu engka kitai ulih ngurang taba muai uras.
“Siti ari pengawa ti dikemisi kitai diatu iya nya enda kelalu bepanggai ba taba muai uras ngambi teleba enggau ngintu rampa menua,” ku iya.
Iya nibar ke jaku nya lebuh dirandau ba Pengerami Nerima Pengabang Hari Raya Aidilfitri iya ba rumah iya di Demak Laut kena Hari Minggu.
Berebak enggau nya, Datuk Len Talif mega ngelalau rayat Sarawak enda nunu sengapa laban hari kemarau deka datai ba bulan nangkan tu.
Ku iya, gaya hari kelalu ekstrem sekali ke ujan deka ngasuh bah tauka musin kemarau panjai ti ngasuh penusah angus tau nyadi, ti begunaka perati semua raban.
“Nya kebuah kitai deka mansutka siti penerang rasmi ke alai tetiap iku kitai bisi pangku pengawa diri empu nentuka rampa menua kitai seruran dijaga manah,” terang iya.
Datai ngabang, Speaker Kunsil Nengeri Sarawak Tan Sri Datuk Amar Mohamad Asfia Awang Nassar, Sekretari Perintah Sarawak Datuk Amar Mohamad Abu Bakar Marzuki, Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan sereta Sapit Menteri Kebun Dandang Besai enggau Komoditi, Dato Sri Huang Tiong Sii. -EDISI UKAS
Pemberita: Ahmad Daniel Faiz
Gambar: Jonnie Kiew & Ahmad Daniel Faiz
