KUCHING: Rabies di Sarawak diatu ukai semina ngerampit ukui aja, tang mega mayau, lalu nya ngasuh mensia mayuh irau.

Sapit Premier Sarawak, Datuk Amar Profesor Dr Sim Kui Hian madah, berita nya ngasuh chara ti komprehensif agi dikena nagang pengerekai igi penyakit nya.

Iya madah, naka taun tu, tiga kes rabies ngaul pemati udah dirikod, lalu nya nunjukka igi penyakit nya apin pukas.

Ku iya, trend kemaya hari mandangka kena rampit igi penyakit bepun ari mayau nengah ketup tauka keramak.

“Setengah ari kena rampit diatu datai ari mayau, ukai semina ukui lelang,” ku iya lebuh dirandau ba Pengerami Majlis Ramah Mesra Rayat diatur Gabungan Penghulu & Tuai Komuniti Parlimen Petra Jaya di CIDB Convention Centre Sarawak ditu, Hari Minggu.

Nya alai, ku iya, serenih baru strategi nagang rabies beguna endar, nyengkaum negap pengawa matau pemayuh jelu sereta ngerembaika program betuchuk vaksin.

Berebak enggau nya, pengempu jelu inang ditangkan nentuka jelu sida betuchuk ninting taun, kelimpah ngadu pengawa ti patut enti sema bisi kena ketup tauka keramak.

“Enti diketup tauka dikeramak, basu abi telih lalu nganjung diri ke klinik laban kitai enda nemu sekali ke jelu nya bisi kena rampit,” ku iya.

Iya mega madah, pengawa nagang ranies begunaka kerejasama semua raban, nyengkaum komuniti, lalu ukai bepanggai ba agensi perintah aja.

“Kitai semua meseti bejalaika pangku pengawa, besaup nentuka rabies ulih ditagang,” ku iya.

Iya madah baru, perintah deka terus negap program tuchuk vaksin pechuma enggau kimpin nambah penemu, tang pemujur nagang rabies bepanggai ba tikas penyiru enggau pengawa komunit ti kolektif.-EDISI UKAS

Pemberita: Lonney Jinab