KUCHING: Perintah majak negap pengawa besikap nentuka bekal ai enggau kuasa menua tetap tegap taja betapi enggau pemar ubah klimet enggau global.

Sapit Menteri Besai ti mega Menteri Idar Kuasa enggau Transformasyen Ai, Datuk Amar Fadillah Yusof madah, patau rat benung dipejalai kelebih agi napi idar monsun ti ulih mai gaya hari angat sereta ngujung ke kemarau ba sekeda menua.

“Ripot kitai naka diatu, agi ulih dijaga tang kitai deka terus matau enggau ngiga jalai nentuka bekal ai ngagai rayat seruran bisi,” ku iya.

Iya nyebut pekara nya lebuh dirandau ba Pengerami Ramah Mesra Rayat diatur Gabungan Penghulu & Tuai Komuniti Parlimen Petra Jaya di CIDB Convention Centre Sarawak ditu, Hari Minggu.

Kaban Parlimen Petra Jaya nya madah baru, sida chakah bejalaika pengawa nentuka kapasiti pegung simpan chukup enggau nyendiaka alternatif baka nganjung ai ngena lori dikena nyamin bekal semampai bisi.

Berebak enggau nya, iya ngelalau rayat bekelimat ngena ai, kelebih agi maya hari angat nentuka bekal bisi belama.

“Rayat meseti ngelimat ai maya hari angat ngambi bekal ai bisi belama,” ku iya.

Ngenang sektor kuasa, iya madah, bekal diatu agi tegap enggau pengawa mitigasi dipejalai nyengkaum perambu pemansut alternatif ari kompeni bekaul perintah.

“Bekal kitai naka diatu agi tegap,” ku iya.

Ngenang pekara sama, perintah mega matau rega minyak global niki nentuka rega bahan api domestik ulih dijaga.

Iya madah, perintah agi ngetan subsidi bahan api nyengkaum RON95 taja mayar ungkus tinggi ninting bulan.

“Perintah nyau mayar rega subsidi ti besai endar, enda kurang ari dua bilion ringgit sebulan,” terang iya.

Iya mega madah, atur diterit dikena nagang aktiviti mai belalai bahan api sereta nentuka bekal dalam menua semampai chukup.-EDISI UKAS

Pemberita: Lonney Jinab