SELANGAU: Pesaka tenun kain karap raban bansa Iban diatu nyingkang ngagai tikas baru lebuh ukai semina diintu aja, tang diangkat nyadi pemansut ekonomi ti bisi pengulih besai ngagai komuniti menua.

Pekara nya dibantai nengah woksyop Tenun Kain Karap Siri 2 ti tembu diatur di Rh Suli, Lubok Bukut Asal kena Hari Minggu.

Pengawa nutup dipenyadi Menteri ba Opis Premier Sarawak, Dato Sri John Sikie Tayai ti nyemetak madah, pengelandik asal patut dibantai ba aktiviti ekonomi ti meruan.

Ku iya, bala penyereta patut ngena manah pengelandik ti diulih sereta nambah penatai pemisi sida.

“Anang semina pengawa nyambil aja. Enti dikereja enggau manah, asil tenun bisi kualiti tinggi ulih rembu makit besai agi,” ku iya.

Iya mega meransang bala penyereta ngena manah pelasar digital enggau media sosial nyadi pelasar ngelaku dikena ngerembaika makit seriris enggau pengerembai ekonomi kemaya hari.

Woksyop diatur begulai Kelab Nembiak Regas Lubok Bukut, The Iban Women Charitable Trust enggau JKKK Rh Suli nya matak 17 penyereta, tebal agi indu, ti mandangka komuniti tetap angkunka seni pesaka nya.

Kelimpah ngintu identiti budaya, kaul regas raban indu ba pengawa betenun nya mega ngerandang peluang negap ekonomi ruang bilik ari asil produk kraf mar rega.

Sama datai, Kaban Parlimen Selangau, Edwin Banta, pengari IWCT Linda Nanang, Chairman Kelab Nembiak Regas Lubok Bukut, Dr Jawing Chunggat sereta Pegawai Pelilih Selangau, Yalin Asan.-EDISI UKAS