BINTANGOR: Program SABERKAS Prihatin serimbai Hari Raya Aidilfitri 2026 di sitak Kunsil Nengeri (DUN) Meradong diatur richah enggau bala tuai ngabang ngagai genturung pendiau di Bintangor seraya ngerapit kaul begulai enggau peranak menua.

Kaban Kunsil Nengeri (ADUN) Meradong, Datuk Ding Kuong Hiing ti mega Chairman Parti SUPP Pampang Bintangor enggau bini, Datin Kueh Nai Fun, ngetuai ke bala bukai ba program ngabang nya.

Tuju sida ngabang ngambi Aidilfitri richah agi kelimpah negap kaul entara tuai enggau rayat dalam pemaik.

Entara endur ngabang nyengkaum Balai Mayuhguna Kampung Selemas Bintangor, Rumah Penghulu Abg Hashim, Rumah Pemancha Rapen Angga, Kampung Darul Falah, Sungai Gemuan sereta Kampung Melayu Skim B Meradong.

Ba tetiap endur nya, sida disambut enggau ati lantang peranak dia ti sama bekunsi pemakai Hari Raya, ti begulai baka diri sebilik.

Kelimpah ari nya, sida mega bisi ngabang ngagai sekeda rumah orang nyengkaum siku injinia Opis Kereja Raya (JKR) Sarikei, sapit residen Sarikei sereta siku kepala pengajar di pelilih nya.

Berebak enggau nya, Datuk Ding meri terima kasih ke pemanah sambut peranak sereta madah, pengawa ngusung pangan diri nyadi budaya ti ulih negap penyerakup.

“Program baka tu ukai semina mandangka penyiru bala tuai ngagai rayat aja, tang nyadi pelasar beguna ngerapit kaul enggau narak semangat segulai sejalai pupu bansa,” ku iya.

Program SABERKAS Prihatin nya entara inisiatif nentuka kaul rat entara tuai enggau rayat terus dijaga, nipak semangat penyerakup enggau pengelantang ti nyadi pugu pemansang komuniti ba sitak Meradong.- EDISI UKAS