KCFC Minta MFL Mansik Isu Rejista Pemain Scott Wood
KUCHING: Kuching City FC (KCFC) mansik Liga Bolasepak Malaysia (MFL) bejalaika pansik silik bekaul isu rejista pemain import, Scott Wood, ti didawa nadai dipasuk ba nama nurun bemain ketegal pengilap teknikal pegawai pekit.
Presiden KCFC ti mega Tuai Sekretari Politik Premier Sarawak, Dato Fazzrudin Abdul Rahman, madah, raban sida udah meri penerang rasmi disempulang chukup kronologi pekara ti nyadi ngagai MFL ungkup atur bukai.
Nitih penerang, maya rintai rasmi pekit direjista dibantai pegawai pekit, nama Scott Wood didawa nadai dipasuk lalu disilih enggau nama Daniel Amier, taja pemain nya nadai dalam tim laban bakal.
“Nya alai, baka ti dipadah kitai sebedau tu, kitai deka negi pekara tu belalauka atur ditetap, lalu kitai deka minta MFL nyerenih pekara tu,” ku iya.
Iya nyebut pekara nya lebuh dirandau pemberita ba Pengerami Nerima Pengabang Aidilifitri iya diatur di Dewan Hikmah, Petra Jaya kena Hari Dua.
Iya madah baru, raban kelab pechaya engka bisi pengilap tauka penyalah teknikal ba bala pegawai pekit ti ngujungka nama Scott Wood nadai dipasuk ba rintai rasmi.
Berindik ari nya, KCFC ngarap ke MFL ulih nyerenih pekara nya enggau lurus sereta serap, kelimpah mantaika perambu sereta chara mutar ti patut bekaul peminta kelab nya.
Berebak enggau nya, Pengerami Nerima Pengabang Aidilfitri iya richah didedat mensia mayuh ari pupu bansa enggau pengarap ti datai ngabang.
Sama ngabang, Sapit Premier Sarawak Datuk Amar Prof Dr Sim Kui Hian, Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah, Sekretari Perintah Sarawak Datuk Amar Mohamad Abu Bakar Marzuki, Sapit Menteri Utiliti enggau Telekomunikasyen Sarawak Datuk Ibrahim Baki, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai) Datuk Sharifah Hasidah Sayeed Aman Ghazali sereta bala tuai opis bukai. -EDISI UKAS
Pemberita: Ahmad Daniel Faiz
Gambar: Ibanez Jeffery & George Embie
